جدہ(ڈیلی پاکستان آن لائن)مسلم لیگ ن کے قائد اور سابق وزیر اعظم نواز شریف جنیوا سے سعودی عرب کے شہر جدہ پہنچ گئے۔
نجی ٹی وی چینل دنیانیوز کے مطابق جدہ کے کنگ عبدالعزيز انٹرنیشنل ایئر پورٹ پر پاکستان کے سفیر احمد فاروق ، قونصل جنرل اور ن لیگ کے عہدیداروں نے نواز شریف کا استقبال کیا۔
نواز شریف نجی دورے پر سعودی عرب پہنچے جہاں انہوں نے عمرہ کی سعادت بھی حاصل کی۔
اس کے علاوہ سابق وزیر اعظم نواز شریف روضہ رسولﷺ پر حاضری بھی دیں گے اور مسجد نبویﷺ میں نماز جمعہ ادا کریں گے۔
واشنگٹن(ڈیلی پاکستان آن لائن)امریکی نشریاتی ادارے سی این این نے ایک خصوصی مونتاج ویڈیو نشر کی ہے جس میں امریکی صدر ڈونلڈ ٹرمپ کی جانب سے ایران کے ساتھ ممکنہ معاہدے سے متعلق بار بار کیے گئے دعوؤں کو یکجا کیا گیا۔
سی این این کے معروف میزبان اینڈرسن کوپر نے پروگرام کے دوران کہا کہ ٹرمپ ایک بار پھر ایران کے ساتھ معاہدہ قریب ہونے کا دعویٰ کر رہے ہیں، تاہم یہ پہلا موقع نہیں ہے جب انہوں نے ایسی بات کی ہو۔
اینڈرسن کوپر کے مطابق ٹرمپ اب تک کم از کم 39 مرتبہ یہ دعویٰ کر چکے ہیں کہ ایران کے ساتھ ایک اہم معاہدہ یا مفاہمت ہونے والی ہے یا اس کے قریب پہنچ چکے ہیں۔
سی این این کی جانب سے نشر کیے گئے ویڈیو مونتاج میں مختلف اوقات میں ٹرمپ کے وہ بیانات شامل کیے گئے جن میں انہوں نے ایران کے ساتھ مذاکرات، امن معاہدے اور سفارتی پیش رفت کے بارے میں امید ظاہر کی تھی۔
رپورٹ کے مطابق حالیہ دنوں میں بھی ٹرمپ نے دعویٰ کیا ہے کہ ایران کے ساتھ ایک مضبوط اور مؤثر معاہدہ آخری مراحل میں داخل ہو چکا ہے اور جلد پیش رفت متوقع ہے۔
تاہم ناقدین کا کہنا ہے کہ ماضی میں بھی ایسے متعدد دعوے کیے گئے تھے لیکن ان میں سے کئی عملی نتائج تک نہیں پہنچ سکے۔ دوسری جانب ٹرمپ کے حامیوں کا مؤقف ہے کہ ایران کے ساتھ سفارتی رابطوں میں پیش رفت کے امکانات موجود ہیں اور مذاکرات کا عمل جاری ہے۔
سی این این کی رپورٹ اور اینڈرسن کوپر کے تبصرے نے امریکی سیاسی حلقوں میں ایک نئی بحث چھیڑ دی ہے کہ آیا ایران کے حوالے سے ٹرمپ کے تازہ دعوے اس بار حقیقت کا روپ دھار سکیں گے یا نہیں۔
اوٹاوا (ڈیلی پاکستان آن لائن) بغیر لائسنس 17 سال تک کینیڈین ائیرلائن کے طیارے اڑانے والے سابق پائلٹ کو گرفتار کرلیا گیا۔
نجی ٹی وی چینل ’’ جیو نیوز‘‘کے مطابق کینیڈا میں ائیر کینیڈا کے ایک سابق پائلٹ پر تقریباً 17 سال تک بغیر لائسنس کے پرواز کرنے کے الزام میں فوجداری مقدمہ درج کر لیا گیا۔
پولیس کے مطابق جیفری وال نامی پائلٹ کو یکم جون کو گرفتار کیا گیا اور تحقیقات سے معلوم ہوا کہ انہوں نے 2009 سے 2025 کے دوران 900 سے زائد ملکی و بین الاقوامی پروازیں کیں حالانکہ انہوں نے کبھی مطلوبہ لائسنس حاصل نہیں کیا تھا اور نہ ہی لازمی امتحانات مکمل کیے۔
پولیس کے مطابق جیفری وال تقریباً 17 سال تک بوئنگ 767، 777 اور 787 طیارے اڑاتے رہے اور اس دوران تقریباً 30 لاکھ کینیڈین ڈالر (20 لاکھ امریکی ڈالر سے زائد) تنخواہ حاصل کی۔
پولیس کے مطابق جیفری وال اپنے 27 سالہ کریئر کے دوران کمرشل طیارے اڑانے کے مجاز تھے تاہم جب انہیں 2009 میں کپتان کے عہدے پر ترقی دی گئی تو ان کے پاس ائیرلائن ٹرانسپورٹ پائلٹ لائسنس (ATPL-A) موجود نہیں تھا، جو اس عہدے کے لیے لازمی تھا۔
یہ معاملہ 2025 میں معمول کے کریڈینشلز کے جائزے کے دوران سامنے آیا جب پائلٹ لائسنس کی دستاویزات میں بے ضابطگیاں پائی گئیں، جس کے بعد ایئر کینیڈا نے متعلقہ ریگولیٹرز کو آگاہ کیا اور تحقیقات کا آغاز کیا گیا تاہم اس وقت جیفری وال ریٹائر ہوچکے تھے۔
تہران (ویب ڈیسک) تازہ امریکی حملوں کے جواب میں ایران کا بحرین میں پانچویں امریکی نیول بیس،اردن میں واقع الأزرق ایئر بیس اور کویت میں امریکی اڈے سمیت ’18 اہداف‘ کو نشانہ بنانے کا دعویٰ کردیاہے ۔
بی بی سی کے مطابق امریکی سینٹرل کمانڈ نے ایران پر جمعرات کو مزید حملوں کے بعد کارروائی روکنے کا اعلان کیا ہے تاہم یہ معلوم نہیں ہوسکا کہ کن اہداف کو نشانہ بنایاگیا، اس سے پہلے۔ ایرانی خبر رساں ایجنسیوں کے مطابق تہران کے مھر آباد ایئر پورٹ، کرج شہر، ابیق اور قزوین میں دھماکے سنے گئے۔
الجزیرہ اور بی بی سی کے مطابق تازہ حملوں کے جواب میں ایران نے بحرین میں پانچویں امریکی نیول بیس اور کویت میں امریکی اڈے سمیت ’18 اہداف‘ کو نشانہ بنانے کا دعویٰ کیا ہے۔
دوسری ایرانی میڈیا کے حوالے سے بتایاگیا ہے کہ آبنائے ہرمز کو ٹینکروں سمیت جہاز رانی کے لیے بند کردیاگیا ہے اور خبردار کیا ہے کہ گزرنے کی کوشش کرنے والے کسی بھی بحری جہاز کو نشانہ بنایا جائے گا۔
بعدازاں بی بی سی نے بتایا کہ ایران کی پاسدارانِ انقلاب نے دعویٰ کیا ہے کہ اس نے 12 بیلسٹک میزائل استعمال کرتے ہوئے اردن میں واقع الأزرق ایئر بیس اور کنٹرول سینٹر پر امریکی فوج کے اہم اہداف کو نشانہ بنایا۔
پاسداران انقلاب کے مطابق حملے میں امریکی فوج کے جدید لڑاکا طیارے، جن میں F-35، F-15 اور F-16 شامل ہیں کو بھی نشانہ بنایا گیا۔بیان میں کہا گیا کہ یہ کارروائی امریکی فوج کی تنصیبات اور آپریشنل ڈھانچے کو نشانہ بنانے کے لیے کی گئی۔
سینٹکام نے پاسداران انقلاب کے اس دعوے پر کوئی ردعمل ظاہر نہیں کیا ہے لیکن اس نے ایران میں فوجی ذرائع سے امریکی جنگی جہاز پر حملے اور آبنائے ہرمز کی مکمل بندش کے بارے میں سابقہ رپورٹس کو ’غلط‘ قرار دیا ہے۔
واشنگٹن (ویب ڈیسک) اسلحہ خریداری میں معاونت کے الزام میں امریکا نے ایران کی 9 شخصیات اور اداروں پر پابندیاں عائد کردیں۔
امریکی محکمہ خزانہ کے مطابق پابندیاں ایرانی وزارت دفاع، پاسداران انقلاب اورایرانی افواج کو اسلحہ خریداری میں معاونت پر عائد کی گئیں، ایران کو ہتھیاروں کی فراہمی میں معاونت کرنے والے نیٹ ورکس کے خلاف کارروائیاں جاری رکھیں گے۔
واضح رہے کہ ٹرمپ نے اپنے سوشل میڈیا پلیٹ فارم ٹروتھ سوشل پر بیان دیتے ہوئے کہا کہ ’ایران کی فوج مکمل طور پر تباہ و برباد ہو چکی ہے، اس کے بہت سے حصے، جیسے بحریہ اور فضائیہ، اب عملاً موجود ہی نہیں رہے، انہیں مکمل طور پر شکست دی جا چکی ہے‘۔
امریکی صدر کا کہنا تھا کہ ’ایران نے ایسے معاہدے پر مذاکرات کرنے میں بہت زیادہ دیر کردی جو ان کے لیے بہترین ثابت ہو سکتا تھا، اب انہیں اس کی قیمت چکانا پڑے گی‘۔
کابل (ڈیلی پاکستان آن لائن)افغانستان میں گزشتہ 10 ہفتوں کے دوران طوفانی بارشوں اور سیلاب سمیت مختلف قدرتی آفات سے 301 افراد جاں بحق اور 385 زخمی ہوگئے ہیں۔
’’شنہوا‘‘ کے مطابق افغانستان کی قومی آفات سے نمٹنے والی اتھارٹی کے ترجمان حافظ محمد یوسف ہمد نے بتایا کہ ان آفات نے ملک بھر میں انفراسٹرکچر اور روزگار کے ذرائع کو شدید نقصان پہنچایا ہے۔ تقریباً 2 ہزار گھر مکمل طور پر تباہ ہو گئے ہیں جبکہ 7 ہزار 187 گھروں کو جزوی نقصان پہنچا ہے۔ اسی طرح تقریباً 580 کلومیٹر سڑکیں بہہ گئی ہیں جبکہ 30 ہزار 300 ایکڑ سے زائد زرعی زمین پر کھڑی فصلیں یا تو تباہ ہو گئی ہیں یا پانی میں ڈوب گئی ہیں۔
تہران (ویب ڈیسک) ایرانی وزیرِ خارجہ عباس عراقچی نے ایکس پر جاری ایک پیغام میں لکھا ہے کہ ’ہماری سرزمین کے قریب موجود غیر ملکی افواج کو ہمیشہ اپنے انسانی غلطیوں، سادہ اور غیر ارادی حادثات، یا حتیٰ کہ کراس فائر کی زد میں آنے کے خطرات لاحق رہتے ہیں، ان خطرات کو کم کرنے کا بہترین حل یہ ہے کہ وہ ان علاقوں سے نکل جائیں۔‘
ایرانی وزیرِ خارجہ کا مزید کہنا ہے کہ ’ہم سفارت کاری کی زبان میں بات کرنے کو ترجیح دیتے ہیں، لیکن ہم دیگر زبانوں میں بھی مہارت رکھتے ہیں۔‘
واشگنٹن، تہران (ویب ڈیسک) امریکی سینٹرل کمانڈ (سینٹکام) نے ایران پر حملوں کے حوالے سے بیان میں کہا ہے کہ امریکی افواج نے ایک ہیلی کاپٹر کو گرائے جانے کے جواب میں ایران میں کارروائی کی ہے۔
سینٹکام نے ایک بیان میں کہا، ’یہ مشن بلا جواز ایرانی جارحیت کے تناسب میں ایک جواب ہے اور جوابی کارروائی کا سلسلہ مکمل کرلیا گیا‘یہ بات بی بی سی نے رپورٹ کی ۔
دوسری جانب ایرانی پاسدارانِ انقلاب نے اپنے بیان میں کہا ہے کہ ’تشدد کو بڑھاوا دینے والی امریکی حکومت نے آج علی الصبح جسک، سرک اور قشم کے کئی مقامات پر حملے کیے، جس کے نتیجے میں سرک میں ایک مواصلاتی ٹاور کو نقصان پہنچا اور شہری سپلائی کے پانی کے دو ٹینک تباہ ہو گئے۔‘
تہران (ڈیلی پاکستان آن لائن )ایران میں پاسدارانِ انقلاب کے سے منسلک سمجھے جانے والے خبر رساں اداروں نے اردن میں امریکی اڈوں پر میزائل حملوں کی اطلاع دی ہے۔
بی بی سی فارسی کے مطابق پاسدارانِ انقلاب نے دعویٰ کیا ہے کہ اس نے اردن میں جدید امریکی ایف-35 لڑاکا طیاروں کے ہینگرز کو خیبر شکن ٹھوس ایندھن والے میزائلوں سے نشانہ بنایا ہے۔
فارس نیوز ایجنسی نے پاسدارانِ انقلاب کے حوالے سے کہا کہ ’علاقے میں امریکی فضائی اور بحری اڈوں پر 21 اہداف کو نشانہ بنایا گیا۔‘
خبر رساں ادارے نے ان حملوں اور ان کے بعد ہونے والے دھماکوں سے منسوب ویڈیوز بھی شائع کی ہیں تاہم بی بی سی فی الحال آزادانہ طور پر ان تصاویر کی تصدیق کرنے سے قاصر ہے۔
تہران (ویب ڈیسک) پاسداران انقلاب نے طویل فاصلے تک مار کرنے والے میزائل استعمال کرتے ہوئے (امریکی فوجی اڈوں کے) چار بڑے اہداف کو تباہ کر نے کا دعویٰ کیا ہے اور کہاہے کہ امریکی حملوں کے جواب میں ایران کا بحرین ، کویت اوراردن میں امریکی اڈوں، پانچویں بیڑے کے ریڈارسسٹم کو نشانہ بنایا اور خلیج فارس میں امریکی ڈرون مارگرایاہے۔ایرانی خبر رساں ادارے ارنا نے پاسداران انقلاب کا حوالہ دے کر کہا ہے کہ ’ان میں F-35 کے ہینگرز اور اردن کے علاقے الازرق میں ایک امریکی فوجی کمانڈ اور کنٹرول مرکز شامل ہیں۔‘
بی بی سی اردو کے مطابق ارنا کے ایکس کے اکاؤنٹ پرشیئر کی گئی فوٹیج میں قدر، عماد اور خیبر شکن نامی طویل فاصلے تک مار کرنے والے میزائلوں کو خطے میں امریکی اہداف پر فائر کرتے ہوئے دکھایا گیا ہے، جو بدھ کی صبح ہونے والے حملے کے جواب میں کیا گیا تاہم بی بی سی آدادانہ طور پر اس فوٹیج کی تصدیق نہیں کر سکا۔
ایرانی نشریاتی ادارے کے مطابق، فوج نے ان حملوں کو جنوبی ایران کے باشندوں کے خلاف امریکی ’ہراساں کیے جانے‘ کے بعد ’جوابی اقدام‘ قرار دیا۔ایران میں جنگ کے انتظام کے انچارج خاتم الانبیا کے ہیڈکوارٹر نے جنوبی ایران کے بعض حصوں پر امریکی حملوں کے ایک گھنٹہ بعد ایک بیان جاری کیا اور حملوں کی تفصیلات بتائیں اوربیان میں خبردار کیا گیا ہے کہ اگر امریکی حملے جاری رہے تو ایران کی جانب سے ’مزید سخت ردعمل‘ دیا جائے گا۔
اس سے قبل پاسداران انقلاب نے اعلان کیا تھا کہ اس نے بحرین میں امریکی بحریہ کے اڈے پر حملہ کیا۔تسنیم خبررساں ادارے نے پاسداران انقلاب کے حوالے سے بتایا ہے کہ ’دشمن کے مذموم اقدام کے جواب میں، پاسداران انقلاب کی بحری افواج نے بحرین کے پانچویں بحری بیڑے پر صبح ڈھائی بجے ڈرون حملہ کیا‘۔
پاسداران انقلاب نے کہا کہ اس نے آبنائے ہرمز میں جاری فضائی لڑائی کے دوران ایک ایم کیو-9 ڈرون کو مار گرایا ہے، ڈرون کا مقصد ’شمالی خلیج فارس کے آسمان سے میدان جنگ میں داخل ہونا اور مداخلت کرنا تھاجسے’جام کاؤنٹی، بوشہر صوبے کی فضا میں تباہ کیا گیا ہے تاہم سینٹکام نے ابھی تک اس دعوے کا جواب نہیں دیا ہے۔
ادھر فارس نیوز ایجنسی نے اطلاع دی ہے کہ پاسداران انقلاب نے اردن میں امریکی فوجی اڈے پر میزائل حملہ کیا ہے۔پاسداران انقلاب کے بیان کے مطابق ’اس نے اپنے طویل فاصلے تک مار کرنے والے ٹھوس ایندھن کے میزائلوں کے ذریعے ’چار اہم اہداف کو نشانہ بنایا، جن میں امریکی فضائی اڈے پر F-35 لڑاکا جیٹ ہینگرز اور آرمی کمانڈ اینڈ کنٹرول سینٹر‘ شامل ہیں، ابھی تک امریکی ذرائع نے اس حملے پر کوئی ردعمل ظاہر نہیں کیا ہے۔
اس سے قبل خاتم الانبیاء کے ہیڈ کوارٹر نے اپنے اعلان میں کہا تھا کہ ایرانی حملے پاسداران انقلاب اور ایرانی فوج نے مشترکہ طور پر کیے تھے۔ایران کی جانب سے حملوں کے بعد اب کویت سے خبر سامنے آئی ہے کہ اس نے ایران کی جانب سے کیے گئے حملوں کو روک لیا ہے۔
بی بی سی اردو کے مطابق سوشل میڈیا پلیٹ فارم ایکس پر کویتی آرمی جنرل سٹاف نے اعلان کیا ہے کہ ملک کے فضائی دفاعی نظام نے ’دشمن کے فضائی اہداف‘ کو روک دیا ہے۔کویتی فوج نے رہائشیوں پر زور دیا کہ وہ ’مجاز حکام کی طرف سے جاری کردہ حفاظتی اور حفاظتی رہنما خطوط پر عمل کریں اور با اختیار سرکاری ذرائع سے معلومات حاصل کریں۔‘
یادرہے کہ بدھ کی صبح پاسداران انقلاب کے جاری کردہ بیان میں کہا گیا کہ ’آج علی الصبح امریکہ نے جسک، سرک اور قشم کے کئی مقامات پر حملہ کیا، جس سے سرک میں ایک ٹیلی کمیونیکیشن ٹاور کو نقصان پہنچا اور شہر کے ضلع بیمانی میں پانی کے دو ٹینک تباہ کر دیے، دشمن کے اس مذموم اقدام کے جواب میں، پاسداران انقلاب نے ایف آئی آر کی نیوی پر حملہ کیا۔‘
پاسداران انقلاب کے بیان میں ’جھڑپوں کے جاری رہنے‘ کا اعلان کیا گیا اور کہا گیا کہ ’اگر برائی جاری رہی تو سخت ردعمل سامنے آئے گا۔‘