Category: تازہ ترین

لاہور(ڈیلی پاکستان آن لائن) پاکستان کرکٹ بورڈ (پی سی بی) نے ملک بھر میں سکول کرکٹ کے فروغ اور نئے ٹیلنٹ کی تلاش کے لیے پی سی بی ٹیلنٹ ہنٹ پروگرام فار سکولز کے دوسرے سیزن کا باضابطہ اعلان کر دیا ہے۔

نجی ٹی وی چینل دنیا نیوز کے مطابق اس سلسلے میں سینیئر جنرل منیجر ڈومیسٹک کرکٹ اسامہ شارون اور سابق قومی کپتان مصباح الحق نے پریس کانفرنس سے خطاب کیا۔

پی سی بی حکام کے مطابق پی سی بی ٹیلنٹ ہنٹ پروگرام فار اسکولز 27-2026 کے دوسرے سیزن میں ملک کے 100 اضلاع سے 1200 سکول شرکت کریں گے۔

واضح رہے کہ پہلے سیزن میں 39 اضلاع کے سکولوں نے حصہ لیا تھا۔پہلے سیزن کی کامیابی کو مدنظر رکھتے ہوئے اس مرتبہ پروگرام کا دائرہ کار نمایاں طور پر بڑھا دیا گیا ہے۔

پی سی بی کے مطابق سکولوں کے ٹریننگ کیمپ 10 اگست سے شروع ہوں گے، جبکہ ٹورنامنٹ کا باقاعدہ آغاز 15 ستمبر سے ہوگا۔سکول کرکٹ ٹورنامنٹ کو 4 مرحلوں میں منعقد کیا جائے گا، جن میں ٹیمیں ضلعی، ڈویژنل، صوبائی اور قومی سطح پر مرحلہ وار مقابلہ کریں گی۔

پی سی بی نے اعلان کیا کہ ٹورنامنٹ میں شریک تمام سکولوں کو فنڈنگ کے ساتھ ساتھ تکنیکی معاونت بھی فراہم کی جائے گی تاکہ نوجوان کھلاڑیوں کو بہتر تربیت، معیاری سہولیات اور اپنی صلاحیتوں کے اظہار کے یکساں مواقع میسر آ سکیں۔

پی سی بی کا کہنا ہے کہ اس پروگرام کا مقصد ملک کے طول و عرض سے باصلاحیت نوجوان کرکٹرز کو سامنے لانا، سکول کرکٹ کو مضبوط بنانا اور مستقبل کے قومی کھلاڑیوں کے لیے ایک مؤثر پلیٹ فارم فراہم کرنا ہے۔

کراچی(ڈیلی پاکستان آن لائن)سندھ ہائیکورٹ نے ایم اے جناح روڈ پر واقع پاکستان ری انشورنس کمپنی کی عمارت کی ملکیت کے تنازع سے متعلق، عمارت سیل کیے جانے کے خلاف دائر درخواست ناقابلِ سماعت قرار دے دی۔

 نجی ٹی وی چینل ایکسپریس نیوز کے مطابق سندھ ہائیکورٹ میں سماعت کے دوران درخواست گزار کے وکیل نے مؤقف اختیار کیا کہ عمارت پاکستان ری انشورنس کمپنی کی قانونی ملکیت ہے اور جائیداد 1959 میں ایک معاہدے کے تحت پاکستان انشورنس کارپوریشن کے نام منتقل کی گئی تھی۔

 وکیل کے مطابق متروکہ وقف املاک بورڈ نے مئی میں کسی پیشگی نوٹس کے بغیر عمارت سیل کر دی، جس سے دفتری ریکارڈ تک رسائی اور کاروباری سرگرمیاں شدید متاثر ہوئیں۔  اس موقع پر عدالت سے عمارت ڈی سیل کرنے اور کمپنی کا قبضہ بحال کرنے کی استدعا کی گئی۔ 

متروکہ وقف املاک بورڈ کے وکیل نے مؤقف دیا کہ مذکورہ عمارت متروکہ وقف املاک کی رجسٹرڈ پراپرٹی ہے، جس سے متعلق 1963 میں گزٹ نوٹیفکیشن بھی جاری کیا جا چکا ہے۔ 

وکیل نے بتایا کہ سپریم کورٹ کے احکامات کی روشنی میں غیر مجاز قابضین سے ٹرسٹ پراپرٹیز واگزار کرانے کی کارروائی جاری ہے۔ پاکستان ری انشورنس کمپنی کو شوکاز اور قانونی نوٹس جاری کیے گئے، تاہم کمپنی عمارت کی ملکیت ثابت کرنے میں ناکام رہی، جس کے بعد قانونی کارروائی مکمل کر کے ایف آئی اے کی معاونت سے عمارت سیل کی گئی۔

عدالت نے ریمارکس دیئے کہ درخواست میں معاہدے کی قانونی حیثیت اور متروکہ وقف املاک بورڈ کی کارروائی سے متعلق پیچیدہ سوالات شامل ہیں، جن کے فیصلے کے لیے دستاویزی شواہد اور ریکارڈ کا تفصیلی جائزہ ضروری ہے۔

عدالت نے قرار دیا کہ ملکیت اور قبضے کے تنازع کا فیصلہ آئین کے آرٹیکل 199 کے تحت دائر آئینی درخواست میں نہیں کیا جا سکتا، جبکہ متروکہ وقف املاک بورڈ کے اقدام کے خلاف اپیل کے لیے قانونی فورم بھی موجود ہے۔

سندھ ہائیکورٹ نے درخواست ناقابلِ سماعت قرار دیتے ہوئے درخواست گزار کو ملکیتی تنازع کے حل کے لیے متعلقہ قانون کے تحت دستیاب قانونی فورم سے رجوع کرنے کا حکم دے دیا۔

اسلام آباد(ڈیلی پاکستان آن لائن)الیکشن کمیشن آف پاکستان نے سیاسی جماعتوں سے مالی گوشواروں کی تفصیلات مانگ لیں۔

نجی ٹی وی چینل دنیا نیوز کے مطابق الیکشن کمیشن کا کہنا ہے کہ تمام سیاسی جماعتیں 29 اگست تک مالی گوشوارے جمع کروائیں، مالی سال 2025-26 کے اکاؤنٹس فارم-ڈی پر جمع ہوں گے۔

ای سی پی نے واضح کیا ہے کہ سیاسی جماعتیں گوشواروں کے ساتھ چارٹرڈ اکاؤنٹنٹ کی آڈٹ رپورٹ لازمی جمع کرائیں، جبکہ پارٹی سربراہ ممنوعہ فنڈنگ نہ ملنے کا سرٹیفکیٹ دیں گے۔

الیکشن کمیشن کے مطابق فارم-ڈی میں اوور رائٹنگ قابل قبول نہیں ہوگی، سیاسی جماعتوں کو یکم جولائی 2025 سے 30 جون 2026 تک کی بینک سٹیٹمنٹس بھی گوشواروں کے ساتھ جمع کرانا ہوں گی۔

ای سی پی نے مزید ہدایت کی ہے کہ مالی گوشوارے صرف سیکرٹری الیکشن کمیشن کے دفتر میں بذاتِ خود جمع کرائے جائیں گے، جبکہ ڈاک، فیکس یا کوریئر کے ذریعے موصول ہونے والے فارم قبول نہیں کیے جائیں گے۔

ماسکو ( مانیٹرنگ ڈیسک )  یوکرین کے روس کے مغربی علاقے تامبوف میں  ڈرون حملے میں 7 افراد ہلاک ہو گئے۔

’’جیو نیوز ‘‘ نے روسی حکام کے حوالے سے بتایا ہے کہ  یوکرینی حملوں کے باعث لاجسٹکس سینٹر پر کام کرنے والے 7 افراد ہلاک اور 24 زخمی ہوئے۔

سوشل میڈیا پر تامبوف میں یوکرینی ڈرون حملے کی ویڈیو بھی زیر گردش ہے جس میں حملے کے بعد بڑے پیمانے پر آگ لگنے اور آسمان پر کالے دھویں کے بادل واضح طور پر دیکھے جا سکتے ہیں۔

 ایک ویڈیو میں حملے کے بعد عوام کو محفوظ مقام پر منتقل ہوتے بھی دیکھا جا سکتا ہے۔ 

میئر ماسکو کا کہنا ہے کہ گزشتہ رات یوکرین نے ماسکو ریجن کی جانب 370 سے زائد ڈرونز سے حملہ کیا، بیشتر یوکرینی ڈرونز کو فضائی دفاعی نظام نے تباہ کردیا۔

نئی دہلی ( مانیٹرنگ ڈیسک )بھارتی نجی خلائی کمپنی سکائی روٹ ایرو سپیس نے اپنے پہلے راکٹ وکرم-1 کو خلاء میں بھیج دیا۔

بھارتی میڈیا کے مطابق راکٹ مشن ’’آگمن‘ ‘کے تحت راکٹ نے سری ہری کوٹا سے پرواز کی اور اپنے پے لوڈ کو 450 کلو میٹر بلند مدار میں پہنچا دیا۔

لانچ سے چند منٹ قبل تکنیکی جانچ کے باعث پرواز کو عارضی طور پر روکا گیا تاہم بعد ازاں راکٹ نے اڑان بھری۔

خلاء میں اس مشن کو بھیجنے کے بعد سکائی روٹ عالمی سطح پر ان چند نجی کمپنیوں میں شامل ہو گئی ہے جنہوں نے مداری راکٹ تیار کر کے لانچ کیا۔

وکرم-1 ایک کثیر مرحلہ راکٹ ہے جو 350 کلو گرام تک وزنی چھوٹے سیٹلائٹس کو مدار میں پہنچانے کی صلاحیت رکھتا ہے۔

اس راکٹ میں مقامی طور پر تیار کردہ انجن، 3-ڈی پرنٹڈ ٹیکنالوجی اور جدید ڈھانچہ استعمال کیا گیا ہے۔

 بیروت ( مانیٹرنگ ڈیسک )لبنان کے صدر جوزف عون اپنے امریکی ہم منصب ڈونلڈ ٹرمپ کی دعوت پر امریکہ  روانہ ہو گئے۔

بیروت میں ایوانِ صدر کی جانب سے جاری بیان کے مطابق لبنانی صدر کی  امریکی صدر ڈونلڈ ٹرمپ سے ملاقات متوقع ہے۔وائٹ ہاؤس میں دونوں رہنماؤں کے درمیان دو طرفہ سربراہی اجلاس ہو گا۔

’’جنگ ‘‘ کے مطابق اجلاس میں امریکی حکام کے ساتھ لبنان کی موجودہ صورتِ حال، جنگ بندی کو مستحکم کرنے کے ممکنہ اقدامات، بالخصوص جنوبی لبنان میں امن و استحکام کی بحالی، اسرائیل کے زیرِ قبضہ لبنانی علاقوں سے اسرائیلی فوج کے انخلاء اور ریاستی عملداری کو لبنان کے تمام علاقوں تک وسعت دینے جیسے امور پر تبادلۂ خیال کیا جائے گا۔

چہلم اسلامی تاریخ کا ایک اہم دن ہے جو واقعۂ کربلا کے چالیس دن بعد منایا جاتا ہے۔ یہ دن حضرت امام حسینؑ، ان کے اہلِ بیتؑ اور وفادار ساتھیوں کی عظیم قربانیوں کی یاد تازہ کرتا ہے۔ دنیا بھر میں لاکھوں مسلمان اس موقع پر مجالس، جلوس، دعاؤں اور خیرات کے ذریعے شہدائے کربلا کو خراجِ عقیدت پیش کرتے ہیں۔

چہلم، جسے اربعین بھی کہا جاتا ہے، محرم الحرام کی دسویں تاریخ (یومِ عاشورہ) کے چالیس دن بعد یعنی 20 صفر کو منایا جاتا ہے۔ روایت کے مطابق اسی دن حضرت امام حسینؑ کے اہلِ خانہ دوبارہ کربلا پہنچے اور شہداء کی قبور پر حاضری دی۔ یہ دن صبر، استقامت اور حق پر قائم رہنے کی علامت سمجھا جاتا ہے۔

سن 61 ہجری میں میدانِ کربلا میں حضرت امام حسینؑ نے ظلم، جبر اور ناانصافی کے خلاف ڈٹ کر مقابلہ کیا۔ اگرچہ ان کے ساتھیوں کی تعداد بہت کم تھی، لیکن انہوں نے حق اور انصاف کا ساتھ نہیں چھوڑا۔ امام حسینؑ اور ان کے جانثار ساتھیوں نے اپنی جانوں کی قربانی دے کر اسلام کی حقیقی تعلیمات کو زندہ رکھا۔

پاکستان، عراق، ایران، بھارت اور دیگر کئی ممالک میں چہلم کے موقع پر خصوصی مجالس، جلوس اور دعائیہ تقریبات منعقد کی جاتی ہیں۔ عراق کے شہر کربلا میں حضرت امام حسینؑ اور حضرت عباسؑ کے روضوں پر لاکھوں زائرین حاضری دیتے ہیں، جسے دنیا کے بڑے مذہبی اجتماعات میں شمار کیا جاتا ہے۔

پاکستان میں چہلم کے موقع پر جلوسوں اور مجالس کے لیے سخت سیکیورٹی انتظامات کیے جاتے ہیں۔ قانون نافذ کرنے والے ادارے امن و امان برقرار رکھنے کے لیے اضافی نفری تعینات کرتے ہیں، جبکہ ٹریفک کے متبادل راستے بھی مقرر کیے جاتے ہیں تاکہ شہریوں کو کم سے کم مشکلات کا سامنا ہو۔

چہلم ہمیں یہ سبق دیتا ہے کہ حق، انصاف، صبر، قربانی اور انسانیت کی حفاظت ہر دور میں اہم اقدار ہیں۔ حضرت امام حسینؑ کی قربانی ہمیں ظلم کے سامنے ڈٹ جانے، سچ کا ساتھ دینے اور اعلیٰ اخلاقی اصولوں پر قائم رہنے کی ترغیب دیتی ہے۔

شہدائے کربلا کی قربانیاں آج بھی پوری انسانیت کے لیے ہدایت، حوصلے اور استقامت کا عظیم پیغام ہیں، اور چہلم کا دن انہی عظیم اقدار کو یاد کرنے اور ان پر عمل کرنے کی دعوت دیتا ہے۔

کراچی(ڈیلی پاکستان آن لائن)جون 2026ء میں ملک کا کرنٹ اکاؤنٹ 64 کروڑ 90 لاکھ ڈالرز خسارے میں رہا۔

روزنامہ جنگ کے مطابق سٹیٹ بینک آف پاکستان کا کہنا ہے کہ جون میں تجارتی خسارہ مئی کے مقابلے 8 فیصد اضافے کے بعد 3 ارب 55 کروڑ ڈالرز رہا۔

اعداد و شمار کے مطابق جون میں ملکی درآمدات مئی کے مقابلے 9 فیصد بڑھ کر 6 ارب 14 کروڑ ڈالرز رہیں، جبکہ برآمدات 10 فیصد اضافے کے بعد 2 ارب 38 کروڑ ڈالرز ریکارڈ کی گئیں۔ 
سٹیٹ بینک نے بتایا ہے کہ جون میں تجارت، خدمات اور آمدن کا مجموعی خسارہ 4 ارب 34 کروڑ ڈالرز رہا، جبکہ ورکرز ترسیلات مئی کے مقابلے 18 فیصد کم ہو کر 3 ارب 47 کروڑ ڈالرز رہ گئیں، مئی 2026ء میں ورکرز ترسیلات 4 ارب 37 کروڑ ڈالرز تھیں۔

سٹیٹ بینک کے مطابق مالی سال 26-2025ء کے دوران کرنٹ اکاؤنٹ خسارہ 13 کروڑ 90 لاکھ ڈالرز رہا۔

اعداد و شمار کے مطابق مالی سال 26-2025ء میں ملکی برآمدات 5 فیصد کمی کے بعد 30 ارب 84 کروڑ ڈالرز رہیں، جبکہ مالی سال 25-2024ء میں برآمدات 32 ارب 34 کروڑ ڈالرز تھیں۔

سٹیٹ بینک کے مطابق مالی سال 26-2025ء میں درآمدات 9 فیصد اضافے کے ساتھ 64 ارب 46 کروڑ ڈالرز رہیں، جبکہ مالی سال 25-2024ء میں درآمدات 59 ارب 14 کروڑ ڈالرز تھیں۔

رپورٹ کے مطابق مالی سال 26-2025ء میں تجارت، خدمات اور آمدن کا خسارہ 14 فیصد اضافے کے بعد 43 ارب 95 کروڑ ڈالرز رہا، جبکہ اسی عرصے کے دوران ورکرز ترسیلات 9 فیصد اضافے سے 41 ارب 58 کروڑ ڈالرز ریکارڈ کی گئیں۔

لاہور(ڈیلی پاکستان آن لائن)وزیراعلیٰ پنجاب مریم نواز شریف نے تمام ڈپٹی کمشنرز کو’’سانجھی سبزی‘‘ پراجیکٹ شروع کرنے کی ہدایت کر دی۔

نجی ٹی وی چینل دنیا نیوز کے مطابق وزیراعلیٰ پنجاب مریم نواز شریف کی ہدایت پر مظفر گڑھ میں منفرد منصوبہ شروع کیا گیا ہے، اربن سرکاری بلڈنگز اور دیہی اراضی پر عوام کے لئے موسمی سبزیاں کی کاشت کر کے ضرورت مند افراد کو مفت فراہم کی جا رہی ہیں۔

مظفر گڑھ میں 139 کنال کے 140 پلاٹس پر عوام کے لئے سبزیاں اگائی جا رہی ہیں۔

مظفر گڑھ میں کرسچن برادری کے گاؤں سے”سانجھی سبزی“ پراجیکٹ کا آغاز کیا گیا ہے، مظفرگڑھ میں لوگ رضاکارانہ طور پر بھی دوسروں کے لئے سبزیاں کاشت کرنے لگے ہیں۔

وزیراعلیٰ پنجاب مریم نواز شریف نے عوام کے لئے “سانجھی سبزی ” کو قابل تقلید قرار دیا اور تمام ڈپٹی کمشنرز کو’’سانجھی سبزی‘‘ پراجیکٹ شروع کرنے کی ہدایت کی ہے۔

وزیراعلیٰ مریم نواز شریف سے ڈی سی مظفر گڑھ محمد عثمان طاہر جپہ نے ملاقات کی، انہوں نے ڈی سی مظفر گڑھ کے عوامی فلاحی اقدام کو سراہا اور ڈپٹی کمشنر مظفر گڑھ محمد عثمان طاہر جپہ کو چیف منسٹر میرٹ بیج اور ایک لاکھ روپے کیش انعام بھی دیا۔

ڈپٹی کمشنر مظفر گڑھ نے وزیراعلیٰ مریم نواز شریف کو سانجھی سبزی پراجیکٹ سے متعلق تفصیلی بریفنگ دی۔

دوران بریفنگ بتایا گیا کہ مظفر گڑھ کے دیہات میں ایک مرلے سے ایک کنال تک سرکاری اراضی کی نشاندہی کر کے سانجھی سبزی لگائی جا رہی ہے، مظفر گڑھ کے دیہی اور شہری علاقوں میں سرکاری عمارتوں سے متصل خالی اراضی میں سبزی کاشت کی جا رہی ہے، ہیلتھ، لوکل گورنمنٹ،فارسٹ، ایجوکیشن، اے سی دفاتر سے متصل 139 کنال اراضی پر سبزی اگائی جا رہی ہے۔

لراچی(ڈیلی پاکستان آن لائن)پاکستانی شوبز انڈسٹری کی معروف میزبان و اداکارہ صنم جنگ نے بتایا ہے کہ مجھے پاکستان آئے ہوئے 1 ماہ ہو گیا ہے اس دوران مجھ پر 6 بار ڈرائیونگ کا جرمانہ لگ چکا ہے اور ایسی چیزوں پر بھی جرمانہ ہوا جو میں نے کی ہی نہیں۔

روزنامہ جنگ کے مطابق صنم جنگ نے فوٹو اینڈ ویڈیو شیئرنگ ایپ انسٹاگرام پر اپنی ایک ویڈیو شیئر کی ہے جس میں انہوں نے کراچی میں ای چلان کے نظام کے نافذ ہو جانے کی وجہ سے در پیش مشکلات بتائی ہیں۔

انہوں نے بتایا ہے کہ 1 مہینے میں مجھ پر  6 جرمانے ہونے پر میرے ابو بہت غصے میں ہیں۔