Category: قومی

پاکستان اور کینیڈا نے دوطرفہ تعلقات کو مزید مضبوط بنانے، تجارت و سرمایہ کاری، تعلیم، موسمیاتی تبدیلی، سکیورٹی اور عوامی روابط سمیت مختلف شعبوں میں تعاون کے فروغ پر اتفاق کرنے اور مشترکہ مفادات کے شعبوں میں شراکت داری کو وسعت دینے کے عزم کا اظہار کیا ہے۔

اسلام آباد میں کینیڈا کی وزیر خارجہ انیتا آنند کے ہمراہ مشترکہ پریس کانفرنس سے خطاب کرتے ہوئے نائب وزیراعظم و وزیر خارجہ اسحاق ڈار نے کہا کہ پاکستان سرمایہ کاروں کے لیے سازگار ماحول فراہم کرنے کے لیے پرعزم ہے اور کینیڈین کمپنیوں کو پاکستان میں ابھرتے ہوئے سرمایہ کاری کے مواقع سے فائدہ اٹھانے کی دعوت دیتا ہے۔

انہوں نے کہا کہ دونوں ممالک کے درمیان تعلیم، لیبر موبیلٹی، قونصلر امور، سائنس و ٹیکنالوجی، موسمیاتی تبدیلی اور عوامی روابط سمیت مختلف شعبوں میں تعاون بڑھانے پر تفصیلی تبادلہ خیال ہوا۔

اسحاق ڈار نے بتایا کہ فریقین کی ملاقات میں افغانستان کی صورتحال، انسداد دہشت گردی اور دیگر علاقائی و عالمی امور بھی زیر غور آئے۔ انہوں نے کہا کہ انہوں نے جموں و کشمیر تنازع کا معاملہ بھی اٹھایا، جو 1948 سے اقوام متحدہ کی سلامتی کونسل کے ایجنڈے پر موجود ایک حل طلب بین الاقوامی تنازع ہے۔

وزیر خارجہ نے کہا کہ بھارت کی جانب سے سندھ طاس معاہدے کو معطل رکھنے کے اعلان نے خطے کی پہلے سے کشیدہ صورتحال میں مزید پیچیدگی پیدا کی ہے۔ انہوں نے کہا کہ پاکستان توقع رکھتا ہے کہ کینیڈا سمیت دوست ممالک بھارت پر زور دیں گے کہ وہ فوری طور پر سندھ طاس معاہدہ بحال کرے، پانی کو بطور ہتھیار استعمال کرنے کی پالیسی ترک کرے اور بین الاقوامی قوانین اور معاہداتی ذمہ داریوں کی پاسداری کرے۔

اسحاق ڈار نے کہا کہ پاکستان باہمی احترام، مشترکہ مفادات اور امن، استحکام و خوشحالی کے فروغ کے مشترکہ عزم کی بنیاد پر کینیڈا کے ساتھ تعلقات کو مزید مستحکم بنانے کا خواہاں ہے۔

انہوں نے کہا کہ دونوں ممالک کے درمیان ہونے والی بات چیت کی مشترکہ ترجیحات اور نتائج پر مبنی اعلامیہ بعد میں وزارت خارجہ کی ویب سائٹ پر جاری کیا جائے گا۔

کسی کینیڈین وزیر خارجہ کا دو دہائیوں میں پہلا دورہ

اس موقع پر کینیڈا کی وزیر خارجہ انیتا آنند نے کہا کہ تقریباً 20 برس بعد کسی کینیڈین وزیر خارجہ کا پاکستان کا دورہ دونوں ممالک کے تعلقات میں ایک اہم سنگ میل ہے۔ انہوں نے کہا کہ پاکستان اور کینیڈا کے درمیان 80 برس سے سفارتی تعلقات قائم ہیں اور اب اقتصادی تعاون، تجارت اور سرمایہ کاری کو مزید فروغ دینے کا وقت آ گیا ہے۔

انہوں نے کہا کہ کینیڈا اپنی تجارتی تنوع کی حکمت عملی کے تحت آئندہ دس برسوں میں امریکا سے باہر تجارت کو دوگنا کرنے کا ہدف رکھتا ہے اور اس تناظر میں پاکستان ایک اہم شراکت دار ہے۔ ان کا کہنا تھا کہ کینیڈا میں مقیم 3 لاکھ سے زائد پاکستانی نژاد کینیڈین دونوں ممالک کے درمیان مضبوط پل کا کردار ادا کر رہے ہیں۔

انیتا آنند نے کہا کہ مشرق وسطیٰ کی کشیدہ صورتحال پر بھی تبادلہ خیال کیا گیا اور کینیڈا خطے میں کشیدگی میں اضافے پر تشویش رکھتا ہے۔ انہوں نے شہری تنصیبات پر حملوں کی مذمت کرتے ہوئے تمام فریقوں پر زور دیا کہ وہ تحمل کا مظاہرہ کریں، شہریوں کے تحفظ کو یقینی بنائیں اور مسائل کے حل کے لیے سفارتی ذرائع اختیار کریں۔

‘پاکستان نے ایک سال میں 4 لاکھ 70 ہزار ٹن کینیڈین کینولا درآمد کیا’

دوطرفہ تعاون کے حوالے سے انہوں نے اعلان کیا کہ دونوں ممالک نے فارن انویسٹمنٹ پروموشن اینڈ پروٹیکشن ایگریمنٹ (FIPA) کو جلد از جلد حتمی شکل دینے پر اتفاق کیا ہے، جس سے سرمایہ کاروں کو زیادہ اعتماد اور تحفظ حاصل ہوگا۔ انہوں نے کہا کہ کینیڈا پاکستان کے ساتھ زرعی تجارت بڑھانے کا خواہاں ہے اور کینولا، چنے اور دالوں کی برآمدات میں مزید اضافہ متوقع ہے، جبکہ پاکستانی چاول، ٹیکسٹائل اور کھیلوں کا سامان بھی کینیڈا میں مقبول ہو رہا ہے۔

انہوں نے نائب وزیر اعظم اسحاق ڈار کا شکریہ ادا کرتے ہوئے کہا کہ ان کے تعاون کے باعث “پچھلے زرعی سال کے دوران پاکستان نے کینیڈا سے 4 لاکھ 70 ہزار ٹن کینولا سے درآمد کیا”۔

ونڈ پاورمنصوبے پر کے۔الیکٹرک کے ساتھ اشتراک    

کینیڈین وزیر خارجہ نے کہا کہ قابل تجدید توانائی، کان کنی اور اہم معدنیات کے شعبوں میں بھی تعاون کے وسیع امکانات موجود ہیں۔ انہوں نے بتایا کہ کینیڈین کمپنی جے سی ایم پاور کراچی الیکٹرک کے اشتراک سے 240 میگاواٹ کے دھابیجی ہائبرڈ ونڈ اینڈ سولر منصوبے پر جلد کام شروع کرے گی، جبکہ ریکوڈک منصوبے میں کینیڈین سرمایہ کاری دونوں ممالک کے اقتصادی تعاون کی اہم مثال ہے۔

22 لاکھ ڈالر کے 3 نئے سکیورٹی منصوبے 

انہوں نے پاکستان کے ساتھ سکیورٹی تعاون کو مزید وسعت دینے کا اعلان کرتے ہوئے کہا کہ کینیڈا 22 لاکھ ڈالر سے زائد مالیت کے تین نئے سکیورٹی منصوبوں کی مالی معاونت کرے گا، جن پر انٹرپول، اقوام متحدہ کے اداروں اور رائل کینیڈین ماونٹڈ پولیس کے اشتراک سے عملدرآمد کیا جائے گا۔ ان منصوبوں میں بارڈر مینجمنٹ، انسداد دہشت گردی، مالیاتی جرائم کی روک تھام اور قانون نافذ کرنے والے اداروں کی تربیت شامل ہوگی۔

45 ملین ڈالر کے تین نئے ترقیاتی منصوبے

انیتا آنند نے مزید اعلان کیا کہ کینیڈا پاکستان کے لیے 45 ملین ڈالر مالیت کے تین نئے ترقیاتی منصوبے شروع کرے گا، جن کا مقصد موسمیاتی تبدیلی سے نمٹنے، سیلاب سے متاثرہ علاقوں کی بحالی، تعلیم خصوصاً بچیوں کی تعلیم، تولیدی صحت، خاندانی منصوبہ بندی اور مقامی آبادی کی استعداد کار میں اضافہ ہے۔

ملتان: پنجاب کے تاریخی شہر ملتان میں حضرت بہاؤالدین زکریا رحمۃ اللہ علیہ کے 787ویں سالانہ عرس کے موقع پر 22 جولائی کو مقامی تعطیل کا اعلان کر دیا گیا۔

ڈپٹی کمشنر ملتان ڈاکٹر فیصل سلیم کی جانب سے جاری نوٹیفکیشن کے مطابق 22 جولائی کو ضلع ملتان کے تمام سرکاری دفاتر اور ضلعی ادارے بند رہیں گے تاکہ زائرین اور عقیدت مند عرس کی تقریبات میں بھرپور انداز میں شرکت کر سکیں۔

نوٹیفکیشن میں کہا گیا ہے کہ مقامی تعطیل کا مقصد حضرت بہاؤالدین زکریا ملتانی رحمۃ اللہ علیہ کے مزار پر منعقد ہونے والی مذہبی تقریبات میں شرکت کے لیے عوام کو سہولت فراہم کرنا ہے۔

حضرت بہاؤالدین زکریا رحمۃ اللہ علیہ برصغیر کے عظیم صوفی بزرگ، عالم دین اور سلسلۂ سہروردیہ کے ممتاز پیشوا تھے۔ آپ کی ولادت تقریباً 1170ء میں ملتان کے قریب کوٹ کروڑ میں ہوئی۔ ابتدائی تعلیم کے بعد آپ نے خراسان، بغداد، مکہ اور مدینہ سمیت مختلف علمی مراکز کا سفر کیا، اور اُس دور کے جید علما اور مشائخ سے علم و روحانیت حاصل کی۔ بعد ازاں حضرت شہاب الدین سہروردیؒ سے بیعت کی اور خلافت حاصل کرنے کے بعد ملتان واپس آ گئے، جہاں دین اسلام کی تعلیم و تبلیغ میں مصروف ہو گئے۔

آپ نے ملتان کو علم، روحانیت اور تبلیغ اسلام کا اہم مرکز بنایا اور اپنی خانقاہ کے ذریعے دینی تعلیمات، خدمت خلق، اعتدال اور اخوت کے فروغ میں نمایاں کردار ادا کیا۔

حضرت بہاؤالدین زکریا رحمۃ اللہ علیہ کا وصال 1268ء میں ملتان میں ہوا۔ آپ کا مزار آج بھی لاکھوں عقیدت مندوں کی روحانی عقیدت کا مرکز ہے، جہاں ہر سال ملک بھر سے زائرین عرس کی تقریبات میں شرکت کے لیے پہنچتے ہیں۔

لاہور: قومی کرکٹ ٹیم کے اوپنر فخر زمان نے نوجوانوں میں کھیلوں کے فروغ کے لیے اپنی کرکٹ اکیڈمی الخدمت فاؤنڈیشن کی سرپرستی میں دینے کا اعلان کر دیا۔

قومی کرکٹ ٹیم کے اوپنر فخر زمان نے الخدمت فاؤنڈیشن پاکستان کے مرکزی دفتر کا دورہ کیا، جہاں صدر الخدمت فاؤنڈیشن پروفیسر ڈاکٹر حفیظ الرحمٰن، ڈائریکٹر اسپورٹس انجینئر احمد حماد رشید اور دیگر عہدیداروں نے ان کا استقبال کیا۔ اس موقع پر انہوں نے الخدمت اسپورٹس کمپلیکس کا بھی معائنہ کیا اور نوجوان کھلاڑیوں کے ساتھ کرکٹ کھیلی۔

دورے کے دوران فخر زمان نے اعلان کیا کہ ان کی کرکٹ اکیڈمی اب “الخدمت فخر زمان کرکٹ اکیڈمی” کے نام سے الخدمت فاؤنڈیشن پاکستان کے زیر انتظام کام کرے گی، جبکہ الخدمت کے تعاون سے ملک کے مختلف شہروں میں مزید کرکٹ اکیڈمیز بھی قائم کی جائیں گی۔

فخر زمان نے تقریب سے خطاب کرتے ہوئے الخدمت فاؤنڈیشن کی فلاحی خدمات، خصوصاً آغوش ہومز، یتیم بچوں کی کفالت اور تھیلیسیمیا کے مریض بچوں کے لیے کیے جانے والے اقدامات کو سراہا۔

انہوں نے نوجوانوں کی تربیت، کھیلوں کے فروغ اور مستحق افراد کی خدمت کے لیے الخدمت کے ساتھ مل کر کام کرنے کے عزم کا اظہار کیا۔

صدر الخدمت فاؤنڈیشن پروفیسر ڈاکٹر حفیظ الرحمٰن نے کہا کہ نوجوانوں کو مثبت سرگرمیوں کی طرف راغب کرنے اور کھیلوں کے فروغ کے لیے فخر زمان کے ساتھ شراکت داری ایک اہم سنگ میل ثابت ہو گی۔

انہوں نے کہا کہ الخدمت نوجوان ٹیلنٹ کی سرپرستی اور قومی تعمیر میں کھیلوں کے کردار کو مزید مؤثر بنانے کے لیے بھرپور کردار ادا کرے گی۔

راولپنڈی کے علاقے گلستان کالونی میں افسوسناک واقعہ پیش آیا جہاں ایک شخص نے اپنے سات سالہ بیٹے کو ڈوبنے سے بچانے کے لیے نالہ لئی میں چھلانگ لگا دی۔

ریسکیو 1122 کے مطابق واقعہ ہفتہ کی صبح تقریباً 10 بجے گلستان کالونی، لین نمبر 3 میں پیش آیا، جہاں حفاظتی دیوار نہ ہونے کے باعث بچہ نالے میں گر گیا۔ بچے کی شناخت زاہد کے نام ہوئی جن کی عمر سات سال بتائی جاتی ہے۔

اطلاع ملنے پر بچے کے والد مہربان، عمر تقریباً 35 سے 40 سال، موقع پر پہنچے۔ عینی شاہدین کے مطابق انہوں نے پانی میں کپڑے کا ٹکڑا دیکھ کر گمان کیا کہ وہ ان کے بیٹے کا ہے، جس پر وہ فوراً نالے میں کود گئے تاکہ اسے بچا سکیں۔

تاہم تیز بہاؤ کے باعث بیٹے کے بعد والد بھی پانی میں بہہ گئے اور نظروں سے اوجھل ہو گئے۔

ریسکیو 1122 کی واٹر ریسکیو ٹیم نے اطلاع ملتے ہی سرچ آپریشن شروع کر دیا جبکہ پولیس بھی موقع پر پہنچ گئی۔

ریسکیو حکام کے مطابق تازہ اطلاعات میں والد مہربان کی لاش نالے سے نکال لی گئی ہے، تاہم ان کے بیٹے زاہد کی تلاش کئی گھنٹوں بعد بھی جاری ہے۔

ریسکیو ٹیمیں نالے کے مختلف حصوں میں سرچ آپریشن کر رہی ہیں اور حکام کا کہنا ہے کہ بچے کی تلاش کے لیے ہر ممکن کوشش کی جا رہی ہے۔

یاد رہے کہ مون سون کے دوران راولپنڈی کے نالہ لئی سے متصل علاقوں میں ڈوبنے کے واقعات معمول بن جاتے ہیں۔

ریسکیو 1122 کی جانب سے جاری کردہ سالانہ رپورٹ کے مطابق سال 2025 کے دوران راولپنڈی میں ڈوبنے کے مجموعی طور پر 41 واقعات رپورٹ ہوئے، جن میں 33 افراد جاں بحق جبکہ 10 افراد کو زندہ بچا لیا گیا تھا۔

پاکستان نے بھارتی طیاروں پر فضائی حدود کی پابندی میں توسیع کر دی۔

پاکستان ایئرپورٹس اتھارٹی (PAA) نے بھارتی طیاروں کے لیے پاکستانی فضائی حدود کی بندش میں توسیع کرتے ہوئے نیا نوٹم (NOTAM) جاری کر دیا ہے۔

نوٹم کے مطابق بھارتی رجسٹریشن رکھنے والے تمام طیاروں، بھارتی ایئرلائنز، آپریٹرز اور لیز پر حاصل کیے گئے بھارتی طیاروں پر پاکستانی فضائی حدود کے استعمال کی پابندی 24 اگست 2026 تک برقرار رہے گی۔

پاکستان ایئرپورٹس اتھارٹی کا کہنا ہے کہ یہ پابندی بھارتی فوجی پروازوں پر بھی لاگو ہوگی اور وہ بھی پاکستانی فضائی حدود استعمال نہیں کر سکیں گی۔

نوٹم میں مزید کہا گیا ہے کہ پاکستانی فضائی حدود کی بندش کے باعث بھارتی ایوی ایشن آپریشنز پر عائد پابندیاں بدستور برقرار رہیں گی۔

واضح رہے کہ پاکستان نے 23 اپریل 2025 سے بھارتی طیاروں کے لیے اپنی فضائی حدود بند کر رکھی ہیں جس میں اب مزید ایک ماہ کی توسیع کر دی گئی ہے۔

بعد ازاں پاکستان نے متعدد نوٹمز (NOTAMs) جاری کرتے ہوئے اس پابندی میں وقفے وقفے سے توسیع کی، جو اب 24 اگست 2026 تک برقرار رہے گی۔

یہ پابندی بھارتی رجسٹریشن والے طیاروں، بھارتی ایئرلائنز، آپریٹرز، لیز پر حاصل کیے گئے طیاروں اور بھارتی فوجی پروازوں پر بھی لاگو ہے، جس کے باعث بھارتی پروازوں کو متبادل فضائی راستے اختیار کرنا پڑتے ہیں۔

اس پابندی کی وجہ سے بھارتی ائیرلائنز کو مالی خسارے کا سامنا کرنا پڑ رہا ہے اسی وجہ سے کئی ائیر لائنز معاشی مسائل کا شکار ہو چکی ہیں۔

حکومت کی جانب سے پیٹرولیم مصنوعات کی قیمتوں کا تعین روزانہ ہونے سے اس کے براہِ راست اثرات عام شہری، ٹرانسپورٹ، کاروبار اور مجموعی معیشت پر مرتب ہوں گے۔

اس نظام کے کچھ ممکنہ فوائد ہیں تاہم اس سے کئی چیلنجز بھی جنم لے سکتے ہیں۔اگر پیٹرول اور ڈیزل کی قیمتیں روزانہ تبدیل ہوں گی تو عام شہری کے لیے اپنے روزانہ اور ماہانہ اخراجات کا درست اندازہ لگانا مشکل ہو جائے گا، ملازمت پیشہ افراد، ٹیکسی اور رکشہ ڈرائیورز، موٹر سائیکل استعمال کرنے والے اور چھوٹے کاروباری طبقے کو ہر روز بدلتی قیمتوں کے مطابق اپنا بجٹ تبدیل کرنا پڑے گا۔

پیٹرولیم مصنوعات مہنگی ہونے پر ٹرانسپورٹرز فوری طور پر کرایوں میں اضافے کا مطالبہ کر سکتے ہیں جبکہ قیمتیں کم ہونے کی صورت میں کرایوں میں کمی عموماً فوری نہیں ہوتی، اس سے مسافروں پر اضافی مالی بوجھ پڑ سکتا ہے اور کرایوں کے تعین پر تنازعات بھی پیدا ہو سکتے ہیں، اس سے عوام کے سفری اخراجات میں اضافہ بھی ممکن ہے۔

پاکستان میں زیادہ تر سامان کی ترسیل سڑکوں کے ذریعے ہوتی ہے، اس لیے ڈیزل کی قیمت میں روزانہ اتار چڑھاؤ سبزی، پھل، آٹا، دودھ، گوشت اور دیگر ضروری اشیاء کی قیمتوں پر بھی اثر ڈال سکتا ہے، تاجروں کے لیے لاگت کا درست اندازہ لگانا مشکل ہوگا، جس کے نتیجے میں قیمتوں میں غیر یقینی صورتحال پیدا ہو سکتی ہے۔

اگر مارکیٹ کو مکمل طور پر آزاد چھوڑ دیا گیا تو بعض مقامات پر قیمتوں میں فرق یا اضافے کی توقع پر ذخیرہ اندوزی، مصنوعی قلت یا منافع خوری کے خدشات بڑھ سکتے ہیں، اس صورت میں مؤثر حکومتی نگرانی ناگزیر ہوگی۔

پٹرول پمپ مالکان کا مؤقف ہے کہ روزانہ قیمتوں میں تبدیلی سے موجودہ اسٹاک، خریداری اور فروخت کے حسابات متاثر ہوں گے، اگر نئی قیمت پرانا اسٹاک مہنگا یا سستا کر دے تو انہیں مالی نقصان بھی ہو سکتا ہے، جس کے لیے واضح طریقہ کار درکار ہوگا۔

اگر عالمی منڈی میں خام تیل کی قیمتیں کم ہوں تو روزانہ قیمتوں کا نظام عوام کو فوری ریلیف بھی دے سکتا ہے جبکہ موجودہ نظام میں قیمتوں میں کمی کا فائدہ بعض اوقات کئی دن بعد ملتا ہے، اس کے علاوہ قیمتوں کا تعین عالمی مارکیٹ سے زیادہ ہم آہنگ ہو سکتا ہے۔

روزانہ قیمتوں کے نظام کی کامیابی کا انحصار شفاف طریقہ کار، مؤثر ریگولیشن اور سخت نگرانی پر ہوگا۔ اگر حکومت صارفین، پٹرول پمپ مالکان، آئل مارکیٹنگ کمپنیوں اور ٹرانسپورٹ سیکٹر کو اعتماد میں لے کر واضح قواعد مرتب کرتی ہے تو یہ نظام مؤثر ثابت ہو سکتا ہے بصورت دیگر قیمتوں میں مسلسل اتار چڑھاؤ مہنگائی، بے یقینی اور عوامی مشکلات میں اضافے کا سبب بن سکتا ہے۔

حکومت نے پیٹرول و ڈیزل کی قیمتوں میں اضافہ کر دیا

روزانہ بنیادوں پر پیٹرولیم مصنوعات کی قیمتوں کا نظام ایک بڑی پالیسی تبدیلی ہوگی، اس سے عالمی منڈی کے اثرات فوری طور پر عوام تک پہنچیں گے لیکن اگر اس کے ساتھ مؤثر نگرانی، شفافیت اور صارفین کے تحفظ کے اقدامات نہ کیے گئے تو عام آدمی کو بار بار بدلتی قیمتوں، بڑھتے کرایوں اور مہنگائی کی نئی لہر کا سامنا کرنا پڑ سکتا ہے۔

اسلام آباد ( ڈیلی پاکستان آن لائن )  سینٹرل پاور پرچیزنگ ایجنسی نے بجلی مہنگی کرنے کی درخواست جمع کرادی۔

سینٹرل پاور پرچیزنگ ایجنسی نے بجلی1  روپے 20 پیسے فی یونٹ مہنگی کرنے کی درخواست نیپرا میں جمع کرائی۔

’’جیو نیوز ‘‘ نے ذرائع کے حوالے سے بتایا ہے کہ درخواست کی منظوری پرصارفین پر18 ارب روپے سے زائد کا اضافی بوجھ پڑے گا اور فیصلے کا اطلاق کے الیکٹرک سمیت ملک بھر کے صارفین پر ہوگا۔ 

سی پی پی اے کی جانب سے درخواست جون کی فیول پرائس ایڈجسٹمنٹ کی مد میں جمع کرائی گئی ہے جس پر نیپرا اتھارٹی 29 جولائی کو سماعت کرے گی۔

لاہور(ڈیلی پاکستان آن لائن)وزیر اطلاعات پنجاب عظمیٰ بخاری نے اپنے بیان میں کہا ہے کہ پنجاب میں تعلیم، صحت اور ٹرانسپورٹ کے شعبوں میں انقلابی اقدامات کیے جا رہے ہیں۔

نجی ٹی وی چینل دنیا نیوز کے مطابق وزیر اطلاعات پنجاب عظمیٰ بخاری نے کہا کہ طلباء کو لیب ٹاپ، سکالرشپ، الیکٹرک بائیکس مل رہی ہیں، نوازشریف سکول آف ایمینس منصوبہ تعلیمی انقلاب ثابت ہوگا، لاہور میں نوازشریف کینسر ہسپتال اور سرگودھا میں کاڈیالوجی ہسپتال مکمل ہو چکے ہیں۔

ان کا کہنا تھا کہ پنجاب کے سرکاری ہسپتالوں میں مفت ادویات اور تمام ٹیسٹ مفت ہورہے ہیں، پنجاب میں اضلاع کے بعد تحصیل لیول تک گرین الیکٹرک بسوں کا جال بچھایا جارہا ہے، سخت گرمی کے موسم میں اے سی والی الیکٹرک بسیں عام آدمی کیلئے بہت بڑی نعمت ہیں۔

وزیر اطلاعات نے کہا کہ مریم نواز نے حکومتی وسائل کوپنجاب کے کونے کونے تک پہنچا دیا ہے، پہلے عوام حکومت کو ڈھونڈتے تھے اب حکومت لوگوں کے پاس پہنچ رہی ہے، یہی مریم نواز کی حکومت اور باقی حکومتوں میں سب سے بڑا بنیادی فرق ہے۔

اسلام آباد (ڈیلی پاکستان آن لائن)صدرِ مملکت آصف علی زرداری نے بنوں اور ملحقہ علاقوں میں فتنہ الخوارج کے خلاف کامیاب کارروائیوں پر سیکیورٹی فورسز کو خراجِ تحسین پیش کرتے ہوئے کہا ہے کہ بھارتی سرپرستی میں سرگرم فتنہ الخوارج اور ان کے سہولت کاروں کے خلاف کارروائیاں منطقی انجام تک پہنچائی جائیں گی۔

ایوانِ صدر کے پریس ونگ سے جاری بیان کے مطابق صدر مملکت نے کہا کہ فتنہ الخوارج کے 24 دہشت گردوں کو جہنم واصل کرنا سیکیورٹی فورسز کی پیشہ ورانہ مہارت، عزم اور قربانیوں کا مظہر ہے۔  معصوم شہریوں اور قانون نافذ کرنے والے اداروں کو نشانہ بنانے والے عناصر کسی رعایت کے مستحق نہیں۔ قوم اپنی سیکیورٹی فورسز اور قانون نافذ کرنے والے اداروں کے شانہ بشانہ کھڑی ہے۔

سینئر وزیر سندھ شرجیل میمن کا کہنا ہے کہ معرکہ حق میں بھارت کوعبرتناک شکست دی ،پاک بھارت جنگ میں افواج پاکستان نے اپنی صلاحیتوں کالوہا منوایا،ہمارے جوان شہادت کے جذبے سے سرشار ہیں،مولانا فضل الرحمان کے بیان سے ہر پاکستانی کی دل آزاری ہوئی۔

کراچی میں پریس کانفرنس کرتے ہوئے انہوں نے مطالبہ کیا کہ مولانا فضل الرحمان اپنے بیان کو واپس لیں،الفاظ واپس لینےسےمولانا فضل الرحمان کی عزت کم نہیں ہوگی،معاملےکوانا کا مسئلہ نہ بنائیں۔

ڈبل ڈیکر اور جدید الیکٹرک بسوں کی ایک بڑی تعداد رواں سال کراچی پہنچ جائے گی، شرجیل انعام میمن

مولانا فضل الرحمان کے بیان کوبھارت میں شہ سرخیوں میں جگہ ملی،وہاں خوشی منائی گئی ،ایسا بیان دینے سے گریز کیاجائے جس سے ہمارا دشمن خوش ہو،مولانا فضل الرحمان کیلئے دل میں بہت احترام ہے۔

شرجیل میمن کا مزید کہنا تھا کہ ہمارے شہدا ہمارا فخر ہیں،ملک کیلئے لڑنے کے جذبے کی قیمت تنخواہ نہیں ہوتی،جوان گھر سےنکلتےوقت والدین سے شہادت کی دعا کی درخواست کرتے ہیں،شہدا کا رتبہ ہمیشہ بلند رہے گا۔

سینئرصوبائی وزیر نے کہا کہ بھارت اب پاکستان میں پراکسیز کے ذریعے جنگ لڑ رہا ہے،بیان بازی سےشہید کےرتبے کو کوئی نقصان نہیں پہنچتا،پاک بھارت جنگ میں پوری قوم متحد تھی،پیپلزپارٹی نےکبھی اپنی افواج کےخلاف بات نہیں کی۔بھارت کےخلاف ہرمحاذپرپاکستانی غازی ڈٹے رہے،مولانا فضل الرحمان بیان واپس لیں، ان کےقدوقامت میں اضافہ ہوگا۔

ریاست، عوام اور سیکیورٹی ادارے یکجا،دشمن کو ہر محاذ پر شکست ہوگی،شرجیل میمن

انہوں نے مزید کہا کہ اس بار گندم کی اچھی فصل ہوئی،منافع خوروں نے گندم کی ذخیرہ اندوزی کی ،سندھ حکومت نے ذخیرہ اندوزوں کے خلاف کارروائی کا فیصلہ کیا،17 لاکھ ٹن گندم برآمد کی،سرکاری نوٹس جاری کیےگئے کہ ذخیرہ کی گئی گندم سرکار کےحوالے کی جائے۔

گندم مارکیٹ میں آنے سےقیمت میں 13فیصد کمی ہوئی،گندم کی ذ خیرہ اندوزی کرنے والوں کارروائیاں جاری ہے،حکومت سندھ نے ڈاکٹر آکاش کے قتل کافوری نوٹس لیا،پولیس نے فوری ایکشن لیتے ہوئے ملزمان کو گرفتار کیا۔

شرجیل انعام میمن کا اپنی پریس کانفرنس میں مزید کہنا تھا کہ وزیراعظم کےفیصلےملکی معیشت کومدنظر رکھ کرہوں گے،گندم پرپنجاب اورسندھ نےاپنی اپنی پالیسی بنائی،پنجاب سےافغانستان گندم جانےکی اطلاع درست نہیں،سندھ سےپنجاب گندم جانےکےشواہد موجود ہیں۔آئین کےتحت گندم کی بین الصوبائی ترسیل نہیں روکی جا سکتی۔

سندھ حکومت صرف وعدے نہیں کرتی کام کرکے دکھاتی ہے، شرجیل میمن

مصطفیٰ کمال پہلے وفاقی وزارت سےمستعفی ہوں،نشست چھوڑکرضمنی انتخاب لڑیں، پتہ چل جائے گا۔