Category: دلچسپ اور عجیب

جرمنی کے 32 سالہ آندرے اورٹولف نے صرف 30 سیکنڈ میں پلنجر (سنک صاف کرنے والے آلے) کی مدد سے 60 غبارے پھاڑ کر گینیز ورلڈ ریکارڈ اپنے نام کر لیا۔

اس کارنامے کے ساتھ انہوں نے امریکی کیون ڈین کا سابقہ ریکارڈ توڑ دیا، جنہوں نے 2025 میں 30 سیکنڈ کے دوران 23 غبارے پھاڑ کر یہ اعزاز حاصل کیا تھا۔ 

آندرے اورٹولف کا کہنا تھا کہ یہ چیلنج نہایت دلچسپ اور مزاحیہ تھا اور انہیں غیر معمولی نوعیت کے عالمی ریکارڈز آزمانا بے حد پسند ہے۔

ان کے مطابق غباروں سے متعلق ریکارڈز ہمیشہ تفریح سے بھرپور ہوتے ہیں، اسی لیے انہوں نے پلنجر سے غبارے پھاڑنے کا منفرد چیلنج قبول کیا۔

انہوں نے امید ظاہر کی کہ مستقبل میں وہ اپنے ہی قائم کردہ 60 غباروں کے ریکارڈ کو مزید بہتر بنانے میں کامیاب ہوں گے۔ 

دنیا بھر کے 43 ممالک میں ایک ہی دن کے دوران مجموعی طور پر 31075 اسکائی ڈائیوز مکمل کر کے ایک دن میں سب سے زیادہ ریکارڈ شدہ اسکائی ڈائیوز کا نیا عالمی ریکارڈ قائم کر دیا گیا۔

ورلڈ اسکائی ڈائیونگ ڈے کے موقع پر منعقد ہونے والے اس عالمی ایونٹ کو امریکی پیراشوٹ ایسوسی ایشن، آسٹریلین پیراشوٹ فیڈریشن، برٹش اسکائی ڈائیونگ اور کینیڈین اسپورٹ پیراشوٹنگ ایسوسی ایشن نے مشترکہ طور پر منظم کیا۔

اس ایونٹ نے 2024 میں قائم ہونے والا 30351 اسکائی ڈائیوز کا عالمی ریکارڈ توڑ دیا۔

منتظمین کے مطابق اس مہم میں ہر سطح کے اسکائی ڈائیورز نے حصہ لیا، جن میں پہلی مرتبہ ٹینڈم جمپ کرنے والے افراد بھی شامل تھے۔

امریکی پیراشوٹ ایسوسی ایشن کے ایگزیکٹو ڈائریکٹر البرٹ برکٹولڈ نے کہا کہ ریکارڈ ٹوٹنے کے لیے ہی بنتے ہیں اور ہمیں خوشی ہے کہ دنیا بھر سے ہزاروں افراد نے اس کھیل کا جشن منانے کے لیے حصہ لیا۔

انہوں نے کہا کہ یہ ریکارڈ اسکائی ڈائیونگ کے بڑھتے ہوئے رجحان اور نئے شوقین افراد کی دلچسپی کا ثبوت ہے۔

امریکی ریاست میری لینڈ کی ایک خاتون نے پانچ لاکھ ڈالر مالیت کا لاٹری اسکریچ آف انعام جیت لیا، جس کا سہرا انہوں نے اپنے شوہر کی تحقیق کے سر باندھا۔

خاتون نے میری لینڈ لاٹری حکام کو بتایا کہ وہ اور ان کے شوہر اکثر شوقیہ لاٹری ٹکٹ خریدتے ہیں۔

انہوں نے کہا کہ ’’دونوں لاٹری اس لیے کھیلتے ہیں کیونکہ انہیں یہ پسند ہے۔ یہ ان کے لیے ایک ساتھ لطف اندوز ہونے کا ذریعہ ہے۔ اس سے پہلے بھی ہم ایک بار پانچ سو ڈالر جیت چکے تھے، جو ہمارے لیے بہت خوشی کی بات تھی‘‘۔

خاتون کے مطابق جون کے آخر میں جب وہ خریداری کے لیے جا رہی تھیں تو ان کے شوہر نے خاص طور پر ’گفٹ آف گرین‘ نامی اسکریچ آف ٹکٹ خریدنے کو کہا۔

شوہر نے بتایا کہ وہ میری لینڈ لاٹری کی ویب سائٹ پر مختلف اسکریچ آف گیمز کے باقی ماندہ بڑے انعامات کا جائزہ لے رہے تھے، جہاں معلوم ہوا کہ ’گفٹس آف گرین میں اب بھی چند بڑے انعامات باقی ہیں، اسی لیے انہوں نے یہی ٹکٹ خریدنے کا مشورہ دیا۔

خاتون کی قسمت نے ساتھ دیا اور اسی ٹکٹ پر انہیں پانچ لاکھ ڈالر کا بڑا انعام مل گیا۔

مصر کے ایک باسکٹ بال کھلاڑی نے دو گینیز ورلڈ ریکارڈز اپنے نام کر لیے۔

گینیز ورلڈ ریکارڈز کےمطابق مصر کے 21 سالہ باسکٹ بال کھلاڑی علی وسام نے شاندار مہارت کا مظاہرہ کرتے ہوئے ایک ہی دن میں دو گنیز ورلڈ ریکارڈ اپنے نام کر لیے، جن میں سے ایک ریکارڈ ہارلیم گلوب ٹراٹرز کے کھلاڑی کے پاس تھا۔

علی وسام نے 82 فٹ 10 انچ کے فاصلے سے کامیابی کے ساتھ ہُک شاٹ پھینک کر سب سے زیادہ فاصلے سے ہُک شاٹ پھینک کر پہلا جبکہ 90 فٹ اور 6 انچز کے ساتھ سب سے زیادہ فاصلے سے بیک ورڈ شاٹ پھینک کر دوسرا عالمی ریکارڈ قائم کیا۔

اس سے قبل سے زیادہ فاصلے کے بیک ورڈ شاٹ کا ریکارڈ ہارلیم گلوب ٹراٹرز کے اسٹار کوری ’تھنڈر‘ لا کے پاس تھا۔ انہوں نے 2024 میں 87 فٹ 8 انچ کے فاصلے سے شاٹ لگا کر یہ اعزاز حاصل کیا تھا۔

گنیز ورلڈ ریکارڈز سے گفتگو کرتے ہوئے علی وسام نے کہا کہ یہ ان کے لیے ناقابلِ یقین لمحہ ہے۔ وہ بچپن سے ہارلیم گلوب ٹراٹرز کو دیکھتے آئے ہیں۔ اس لیے ان کا ریکارڈ توڑنا ان کے لیے ایک خواب پورا ہونے جیسا ہے۔

علی وسام ماضی میں مصری قومی باسکٹ بال ٹیم کی نمائندگی بھی کر چکے ہیں۔

چین کے شہر گویانگ میں واقع شوئیکوسی پُل کے نیچے قائم ایک منفرد رہائشی منصوبہ آج بھی لوگوں کی توجہ کا مرکز بنا ہوا ہے۔

1997 میں تعمیر ہونے والے اس پل کے دو سال بعد، شہر میں سستی رہائش کے لیے زمین کی کمی کے باعث حکام نے پل کے نیچے موجود خالی جگہ پر کم لاگت والے اپارٹمنٹ تعمیر کرنے کا فیصلہ کیا۔ 

ابتدائی مرحلے میں تقریباً 10 رہائشی عمارتیں تعمیر کی گئیں جنہیں کم آمدنی والے خاندانوں اور بے گھر ہونے والے افراد کی آبادکاری کے لیے استعمال کیا گیا۔ بعد ازاں پل کے نیچے باقی خالی جگہوں پر مزید عمارتیں بھی بنا دی گئیں۔

اگرچہ پل کے اوپر سے گزرتی گاڑیوں کی مسلسل آواز اور کمپن یہاں رہنے والوں کی روزمرہ زندگی کا حصہ ہیں، لیکن بیشتر مکینوں کا کہنا ہے کہ شہر کے مرکز کے قریب رہائش کی سہولت اس تکلیف سے کہیں زیادہ قیمتی ہے۔ 

رہائشیوں کے مطابق وقت کے ساتھ انہوں نے شور اور وائبریشن کو اپنی زندگی کا معمول سمجھ کر قبول کر لیا ہے، جبکہ شہر کے وسط میں مناسب کرائے پر رہائش ملنا ان کے لیے سب سے بڑا فائدہ ہے۔

امریکا میں لاٹری کھیلنے کے اچانک خیال نے شہری لاکھوں ڈالر کا انعام جتوا دیا۔

ریاست ساؤتھ کیرولائنا کے ایک شخص نے بتایا کہ وہ اپنے گھر کے برآمدے میں بیٹھا تھا، جب اسے اچانک احساس ہوا کہ اسے لاٹری کا ٹکٹ خریدنا چاہیے۔

اس نے بتایا کہ خیال آنے کے بعد وہ اسٹور گیا اور دو ٹکٹ خریدے۔

اس شخص نے اسٹور سے 10، 10 ڈالر کے دو اسکریچ آف ٹکٹ خریدے۔ ان میں سے ایک گولڈ والٹ ایکسٹرا پلے! نکلا جس پر اسے پانچ لاکھ ڈالر کا انعام ملا۔ 

فاتح نے بتایا کہ اتنی بڑی رقم جیتنے کے باوجود اسے اپنی خوشی منانے کا بھی وقت نہیں ملا۔

ایک ٹیکنالوجی اسٹارٹ اپ نے ایسے مائیکرو ڈرونز تیار کیے ہیں جو اڑنے والے کیڑوں کو ہوا میں ہی نشانہ بنا کر ختم کرنے کی صلاحیت رکھتے ہیں۔ 

امریکی اسٹارٹ اپ ٹورنایول، جسے  وائی کومبینٹر کی معاونت حاصل ہے، کے انجینئرز ایک مصنوعی ذہانت سے چلنے والے مائیکرو ڈرون پر کام کر رہے ہیں جو مچھروں کے خاتمے کی لاگت کو 100 گنا تک کم کر سکتا ہے۔ 

ان ننھے ڈرونز کے غول ممکنہ طور پر شہری علاقوں میں مچھروں کا تعاقب کر کے انہیں نشانہ بنا سکتے ہیں، جس سے کیمیائی ادویات یا دیگر زیادہ مہنگے اور ممکنہ طور پر خطرناک طریقوں کے مقابلے میں مچھروں کی آبادی پر قابو پانے کا ایک زیادہ مؤثر اور کم خرچ متبادل فراہم ہو سکتا ہے۔

14 جولائی کو ٹورنایول کے بانیوں میں سے ایک الیکس توسان نے ایک ویڈیو شیئر کی جس میں کمپنی کی فضا میں پہلی کامیاب ہدف پر مبنی کارروائی دکھائی گئی۔ ویڈیو میں ایک چھوٹا ڈرون ایک پتنگے کا تعاقب کرتا ہے اور بالآخر اسے ایک کنٹرول شدہ آزمائشی علاقے میں مار گراتا ہے۔

پتنگا مچھر نہیں ہوتا لیکن یہ تجربہ بھی ایک بہت محدود علاقے میں کیا گیا تھا۔ اس کے باوجود، اسے اس سمت میں ایک اہم پیش رفت قرار دیا جا رہا ہے جہاں ایسا ڈرون تیار کیا جا سکے جو فضا میں موجود کیڑوں کی درست شناخت کرے اور انہیں نشانہ بنا کر ختم کر سکے۔

ٹورنایول کا اعلان کردہ مقصد ایسے 40 گرام وزنی ڈرون تیار کرنا ہے جو اسمارٹ فون کے مائیکرو فونز، الٹراسونک سینسرز اور مخصوص سافٹ ویئر کی مدد سے مچھروں کا سراغ لگائیں اور انہیں نشانہ بنائیں۔ 

یہ ڈرون الٹراسونک لہریں خارج کرنے اور مائیکروفونز کے ایک مجموعے کے ذریعے ان کی بازگشت سننے کے لیے ڈیزائن کیے گئے ہیں۔ چونکہ مچھروں کے پروں کی حرکت ایک منفرد ڈوپلر آواز پیدا کرتی ہے، اس لیے نظریاتی طور پر یہ ڈرون مچھروں کو دوسرے کیڑوں سے الگ پہچان سکتے ہیں۔

ٹورنایول کے انجینئرز الیکس توسینٹ اور کلوویس پیڈالو کو امید ہے ایک دن وہ ان ننھے ڈرونز کے غول استعمال کرکے پورے شہری علاقوں سے مچھروں کا خاتمہ کر سکیں گے۔ 

ان کے مطابق ایسے صرف 10 مائیکرو ڈرونز ایک مربع کلومیٹر کے علاقے کو ان خون چوسنے والے مچھروں سے صاف کرنے کی صلاحیت کے حامل ہونگے۔

کینیڈا کے مغربی صوبے برٹش کولمبیا میں واقع گولڈن ایگل گالف کلب میں ایک دلچسپ واقعہ پیش آیا، جہاں ایک بھالو گالف کورس میں داخل ہو کر ایک گالف کارٹ سے گالف بیگ اٹھا کر لے گیا۔سوشل میڈیا پر وائرل ہونے والی ویڈیو میں دیکھا جا سکتا ہے کہ بھالو کھیل کے دوران اچانک میدان میں آیا، گالف کارٹ کے قریب پہنچا اور وہاں رکھا گالف بیگ گھسیٹتے ہوئے کورس سے باہر لے گیا۔میڈیا رپورٹس کے مطابق بھالو بیگ کو کورس سے باہر موجود ایک دوسرے بھالو کے پاس لے گیا، ویڈیو میں دونوں بھالو کچھ دیر تک بیگ کے ساتھ رہتے ہیں، تاہم تھوڑی دیر بعد بیگ وہیں چھوڑ کر بھاگ جاتے ہیں۔یہ غیر معمولی واقعہ دیکھ کر گالف کھیلنے والے افراد حیران رہ گئے، جبکہ ویڈیو سوشل میڈیا پر تیزی سے وائرل ہو رہی ہے اور صارفین اس پر دلچسپ تبصرے کر رہے ہیں۔

امریکی ٹیکنالوجی اسٹارٹ اپ ٹورنایول (Tornaivol) نے ایسے جدید مائیکرو ڈرونز تیار کرنے کا دعویٰ کیا ہے جو فضا میں اڑتے ہوئے کیڑوں کا تعاقب کرکے انہیں نشانہ بنانے کی صلاحیت رکھتے ہیں۔ کمپنی کے مطابق مصنوعی ذہانت سے لیس یہ ننھے ڈرون مستقبل میں مچھروں کے خاتمے کے لیے کم خرچ اور مؤثر متبادل ثابت ہو سکتے ہیں۔

وائی کومبینٹر کی معاونت سے کام کرنے والی کمپنی کا کہنا ہے کہ اس منصوبے کا مقصد ایسے ڈرونز تیار کرنا ہے جو مچھروں پر قابو پانے کی لاگت کو موجودہ طریقوں کے مقابلے میں تقریباً 100 گنا تک کم کر سکیں۔ کمپنی کے مطابق ان ڈرونز کے غول شہری علاقوں میں مچھروں کو تلاش کرکے انہیں ختم کریں گے، جس سے کیمیائی اسپرے اور دیگر مہنگے یا ممکنہ طور پر نقصان دہ طریقوں پر انحصار بھی کم ہو سکتا ہے۔ 

14 جولائی کو کمپنی کے شریک بانی الیکس توسان نے ایک ویڈیو جاری کی، جس میں ایک مائیکرو ڈرون کو فضا میں ایک پتنگے کا تعاقب کرتے اور آزمائشی ماحول میں اسے کامیابی سے نشانہ بناتے ہوئے دکھایا گیا۔ اگرچہ یہ تجربہ مچھر پر نہیں بلکہ پتنگے پر کیا گیا اور محدود علاقے تک ہی رکھا گیا تھا، تاہم اسے اس ٹیکنالوجی کی جانب ایک اہم پیش رفت قرار دیا جا رہا ہے۔

کمپنی کے مطابق اس کا ہدف صرف 40 گرام وزنی ایسے ڈرون تیار کرنا ہے جو اسمارٹ فون میں استعمال ہونے والے مائیکروفونز، الٹراسونک سینسرز اور جدید سافٹ ویئر کی مدد سے مچھروں کی درست شناخت کر سکیں۔ یہ ڈرون الٹراسونک لہریں خارج کرتے ہیں اور ان کی بازگشت کا تجزیہ کرتے ہیں، جبکہ مچھروں کے پروں کی حرکت سے پیدا ہونے والی مخصوص ڈوپلر آواز کی بنیاد پر انہیں دیگر اڑنے والے کیڑوں سے الگ پہچاننے کی صلاحیت رکھتے ہیں۔

ٹورنایول کے انجینئرز الیکس توسان اور کلوویس پیڈالو کا کہنا ہے کہ ان کی خواہش ہے کہ مستقبل میں ایسے مائیکرو ڈرونز کے غول بڑے شہروں میں مچھروں کی آبادی پر قابو پانے کے لیے استعمال کیے جائیں۔ ان کے مطابق صرف 10 چھوٹے ڈرون ایک مربع کلومیٹر کے علاقے میں خون چوسنے والے مچھروں کا مؤثر انداز میں خاتمہ کرنے کی صلاحیت رکھتے ہوں گے، جس سے صحت عامہ کے شعبے میں بھی مثبت نتائج حاصل کیے جا سکتے ہیں۔ 

امریکا میں 6 کروڑ 70 سال قدیم ڈائنو سار کا ڈھانچہ کروڑوں ڈالر میں نیلام کر دیا گیا۔

امریکی ریاست ساؤتھ ڈکوٹا سے دریافت ہونے والے ٹی رینوسورس ریکس (ٹی ریکس) کے کروڑوں برس قدیم ڈھانچے کو سوتھبیز کی نیویارک میں ہونے والی نیلامی میں 5 کروڑ 13 ہزار ڈالر میں فروخت کر دیا گیا، جس کے ساتھ ہی یہ دنیا کا سب سے مہنگے داموں نیلام ہونے والا فوسل بن گیا۔

یہ ڈھانچہ ’گَس‘ کے نام سے جانا جاتا ہے اور یہ نام ساؤتھ ڈکوٹا کے مویشی پالنے والے گیری ’گَس‘ لِکنگ کے نام پر رکھا گیا جن کی زمین پر یہ فوسل دریافت ہوا تھا۔ گیری لِکنگ 2022 میں، فوسل کی کھدائی شروع ہونے کے ایک سال بعد انتقال کر گئے تھے۔ 

سوتھبیز کے مطابق گَس کی لمبائی 38 فٹ، اونچائی 12.5 فٹ اور کھوپڑی 54 انچ لمبی ہے، جس کے باعث یہ اب تک دریافت ہونے والے سب سے بڑے ٹی ریکس ڈھانچوں میں شمار ہوتا ہے۔

اس ڈھانچے میں 183 فوسل ہڈیاں شامل ہیں، جو ہڈیوں کی تعداد کے لحاظ سے تقریباً 61 فی صد جبکہ مجموعی حجم کے اعتبار سے 75 سے 80 فی صد مکمل ہے۔

یہ فوسل ہیل کریک فارمیشن سے ملا، جو مونٹانا، وائیومنگ اور ڈکوٹا کی ریاستوں تک پھیلا ایک مشہور ارضیاتی علاقہ ہے۔ اس علاقے میں 1902 میں ٹی ریکس کا ابتدائی ڈھانچہ بھی دریافت ہوا تھا اور اسی علاقے سے ملنے والے فوسلز کی بنیاد پر اس ڈائنوسار کو ٹی رینوسورس ریکس کا نام دیا گیا۔ 

اس سے قبل سب سے مہنگے نیلام ہونے والے فوسل کا ریکارڈ ایپیکس اسٹیگوسورس کے پاس تھا، جسے 2024 میں ارب پتی سرمایہ کار کین گرفن نے 4 کروڑ 46 لاکھ ڈالر میں خریدا تھا۔ یہ فوسل اس وقت نیویارک کے میوزیم آف نیچرل ہسٹری میں چار سالہ قرض پر نمائش کے لیے رکھا گیا ہے۔