Category: Entertainment

کوکنگ ٹی وی کی معروف سابق میزبان ابیل جاوید کے شوہر انتقال کر گئے ہیں۔ میڈیا رپورٹس کے مطابق ان کا انتقال مئی 2026 میں دل کا دورہ پڑنے کے باعث ہوا۔ 

ابیل جاوید پاکستانی ٹیلی ویژن کی معروف میزبان ہیں، جنہوں نے لیجنڈری شیف زبیدہ طارق کے ساتھ مقبول کوکنگ شو “ہانڈی” کی میزبانی کی۔ یہ شو پاکستانی ٹیلی ویژن کے طویل ترین جاری رہنے والے کوکنگ شوز میں شمار ہوتا ہے۔ ابیل جاوید نے 2015 میں شادی کے بعد ٹی وی میزبانی سے کنارہ کشی اختیار کر لی تھی۔ وہ دو بیٹیوں کی والدہ ہیں اور اس وقت اپنے یوٹیوب چینل اور انسٹاگرام کے ذریعے مداحوں سے رابطے میں رہتی ہیں۔

ابیل جاوید کے شوہر کے انتقال کی خبر سب سے پہلے ان کی نند نے سوشل میڈیا پر شیئر کی۔ انہوں نے اپنی پوسٹ میں لکھا، “میرے بھائی اور ابیل جاوید کے شوہر دو ماہ قبل انتقال کر گئے تھے۔ براہِ کرم ابیل بھابھی کو اپنی دعاؤں میں یاد رکھیں۔ اللہ تعالیٰ انہیں صبرِ جمیل عطا فرمائے اور انہیں صحت و سلامتی کے ساتھ لمبی زندگی دے۔”

بعد ازاں ایک صارف کے سوال کے جواب میں انہوں نے بتایا کہ ابیل جاوید کے شوہر کا انتقال دل کا دورہ پڑنے کے باعث ہوا۔ ابیل جاوید نے بھی اپنی ایک انسٹاگرام پوسٹ کے کمنٹس میں اپنے شوہر کے انتقال کی تصدیق کر دی۔ تاہم انہوں نے اس حوالے سے مزید تفصیلات شیئر نہیں کیں۔ سوشل میڈیا پر مداح ابیل جاوید کے لیے تعزیت اور صبرِ جمیل کی دعائیں کر رہے ہیں۔

“میں حافظِ قرآن ہوں اور صرف دو سال میں قرآن پاک حفظ کیا۔ شاید یہی وجہ تھی کہ میرے والد کبھی نہیں چاہتے تھے کہ میں شوبز کا حصہ بنوں۔ سچ تو یہ ہے کہ مجھے بھی اداکاری کا کوئی شوق نہیں تھا، شروع میں تو میں نے یہ کام دل سے نہیں کیا۔”

اداکارہ لائبہ خان کا ایک پرانا انٹرویو کلپ دوبارہ سوشل میڈیا پر گردش کر رہا ہے، جس میں انہوں نے اپنی ذاتی زندگی، تعلیم اور شوبز میں آنے کے سفر سے متعلق کئی دلچسپ باتیں شیئر کیں۔

لائبہ خان نے بتایا کہ بچپن میں انہیں قرآن حفظ کرنے کی خواہش نہیں تھی کیونکہ اس عمر میں وہ اس کی اہمیت کو پوری طرح نہیں سمجھتی تھیں۔ تاہم ان کے والدین، خاص طور پر والدہ، کی دلی خواہش تھی کہ وہ حافظِ قرآن بنیں۔ اسی لیے انہوں نے سات برس کی عمر میں حفظ کا آغاز کیا اور صرف دو سال میں یہ سعادت حاصل کر لی۔

انہوں نے بتایا کہ ان کے والد اداکاری کے حق میں نہیں تھے، کیونکہ وہ چاہتے تھے کہ ان کی بیٹی دینی تعلیم کے مطابق زندگی گزارے۔ خود لائبہ بھی ابتدا میں اداکاری کو سنجیدگی سے نہیں لیتی تھیں، لیکن وقت کے ساتھ یہ شعبہ ان کی زندگی کا حصہ بنتا گیا۔

اداکارہ کے مطابق وہ کم عمری میں ہی تعلیمی لحاظ سے آگے بڑھ گئیں اور صرف 10 سال کی عمر میں آٹھویں جماعت میں داخلہ لیا۔ میٹرک کے امتحانات سے پہلے ہی انہوں نے اداکاری کا آغاز کر دیا، جس کے باعث تعلیم اور کیریئر دونوں کو ساتھ لے کر چلنا ایک چیلنج بن گیا۔

لائبہ خان نے بتایا کہ وہ بارہویں جماعت تک تعلیم مکمل کر چکی تھیں، مگر کورونا وبا کے باعث یونیورسٹی میں داخلہ نہ لے سکیں۔ ان کا کہنا تھا کہ وہ اپنی تعلیم ادھوری نہیں چھوڑنا چاہتیں اور مستقبل میں، چاہے شادی کے بعد ہی سہی، یونیورسٹی کی تعلیم ضرور مکمل کریں گی۔

انہوں نے یہ بھی بتایا کہ ان کا کوئی بھائی نہیں، جبکہ ان کی بڑی بہن ایمان خان بھی شوبز انڈسٹری سے وابستہ ہیں۔

میرے دو بہت قریبی دوست ہیں جن کی بہو نے صاف کہہ دیا تھا کہ وہ اپنے شوہر کے والدین کے ساتھ نہیں رہنا چاہتی۔ ان کا صرف ایک ہی بیٹا تھا۔ انہوں نے بہو سے کہا بیٹا، کوئی بات نہیں، ہم استطاعت رکھتے ہیں، ہم خود ایمار میں ایک خوبصورت اپارٹمنٹ میں منتقل ہو جاتے ہیں، تم دونوں یہیں رہو۔ لیکن ان کے بیٹے نے انکار کر دیا۔ اس نے کہا میں اپنے والدین کو چھوڑ کر نہیں جا سکتا، ان کے بغیر نہیں رہ سکتا۔’ نہ وہ والدین برے تھے اور نہ ہی ان کی بہو، بس وہ اپنی آزادی چاہتی تھی۔

پاکستان کی سینئر اداکارہ بشریٰ انصاری کا ایک پرانا پوڈکاسٹ کلپ ایک بار پھر سوشل میڈیا پر توجہ کا مرکز بن گیا ہے جس میں انہوں نے اپنے قریبی دوستوں کے بیٹے کی طلاق سے متعلق ایک واقعہ بیان کیا۔ یہ گفتگو مایا خان کے پوڈکاسٹ کے دوران ہوئی تاہم بشریٰ انصاری نے کسی بھی خاندان یا فرد کا نام نہیں لیا۔ 

اگرچہ اداکارہ نے کسی کی شناخت ظاہر نہیں کی، لیکن سوشل میڈیا پر متعدد صارفین نے اندازہ لگایا کہ ان کا اشارہ اداکارہ سائرہ یوسف اور شہروز سبزواری کی علیحدگی کی جانب تھا۔ یہی وجہ ہے کہ اس کلپ نے دوبارہ نئی بحث چھیڑ دی ہے اور مختلف آرا سامنے آ رہی ہیں۔

کئی صارفین کا کہنا ہے کہ بشریٰ انصاری کسی اور خاندان کی بات کر رہی تھیں اور سائرہ یوسف سے اس واقعے کو جوڑنا درست نہیں۔ دوسری جانب بعض افراد کا مؤقف ہے کہ اگر یہ واقعہ واقعی اسی جوڑے سے متعلق بھی ہو، تب بھی طلاق کی وجہ صرف ایک مسئلہ نہیں ہو سکتی اور اس کے پیچھے دیگر عوامل بھی موجود ہو سکتے ہیں۔

اس کلپ کے وائرل ہونے کے بعد کچھ صارفین نے ایک بار پھر شہروز سبزواری اور اداکارہ صدف کنول سے متعلق پرانے الزامات کا ذکر کیا جبکہ کئی لوگوں نے اس پورے معاملے پر مختلف زاویوں سے اپنی رائے کا اظہار کرتے ہوئے بحث کو مزید ہوا دے دی۔

آسکر ایوارڈ یافتہ آئرلینڈ کی معروف اداکارہ برینڈا فریکر 81 برس کی عمر میں انتقال کر گئیں۔برینڈا فریکر مائی لیفٹ فُٹ، ہوم الون 2: لاسٹ ان نیو یارک اور بی بی سی کے ڈرامے کیجولٹی میں اپنی یادگار اداکاری کی وجہ سے مشہور تھیں۔انہوں نے مائی لیفٹ فُٹ میں شاندار اداکاری پر 1990 میں بہترین معاون اداکارہ کا اکیڈمی ایوارڈ (آسکر) جیت کر تاریخ رقم کی اور آسکر حاصل کرنے والی پہلی آئرش اداکارہ بنی تھیں۔ڈبلن میں فروری 1945 میں پیدا ہونیوالی برینڈا نے اپنے کیریئر کا آغاز 1970 کی دھائی میں تھیٹر اور ٹیلی ویژن سے کیا تھا۔ان کے ایجنٹ فل بیل فیلڈ نے میڈیا کو جاری اپنے بیان میں ان کی موت کی تصدیق کرتے ہوئے کہا کہ ہمیں ان جیسی شخصیت دوبارہ کبھی دیکھنے کو نہیں ملے گی۔انھوں نے کہا کہ ان کی عدم موجودگی نے دنیا کو پہلے سے زیادہ تہی دامن کر دیا ہے، میرے لیے یہ اعزاز کی بات تھی کہ میری ان سے شناسائی تھی اور ان کے ساتھ کام کرنے کا موقع ملا۔ایجنٹ فل بیل فیلڈ نے مزید کہا کہ وہ ہمیشہ میرے دل میں اور مجھ سمیت دنیا بھر کے بے شمار فلم بینوں اور ٹی وی مداحوں کے دلوں میں ہمیشہ زندہ رہیں گی۔

پاکستانی شوبز انڈسٹری کی معروف میزبان و اداکارہ صنم جنگ نے بتایا ہے کہ مجھے پاکستان آئے ہوئے 1 ماہ ہو گیا ہے اس دوران مجھ پر 6 بار ڈرائیونگ کا جرمانہ لگ چکا ہے اور ایسی چیزوں پر بھی جرمانہ ہوا جو میں نے کی ہی نہیں۔صنم جنگ نے انسٹاگرام پر شیئر کی گئی ایک ویڈیو میں کراچی میں ای چالان سسٹم کے باعث پیش آنے والے اپنے تجربات بیان کرتے ہوئے کہا کہ ایک ماہ میں 6 جرمانے ہونے پر ان کے والد بھی خاصے ناراض ہیں۔انہوں نے بتایا کہ پہلا جرمانہ دورانِ ڈرائیونگ موبائل فون پر بات کرنے کی وجہ سے ہوا، جسے انہوں نے اپنی غلطی تسلیم کرتے ہوئے کہا کہ اس پر جرمانہ بنتا تھا۔تاہم اداکارہ کے مطابق بعد ازاں ان پر ایسے جرمانے بھی عائد کیے گئے جن کا انہوں نے ارتکاب نہیں کیا، جن میں سیٹ بیلٹ نہ پہننے کا چالان بھی شامل ہے۔صنم جنگ نے کہا کہ وہ ہمیشہ سیٹ بیلٹ باندھ کر گاڑی چلاتی ہیں، کیونکہ بیرونِ ملک رہنے کے باعث یہ ان کی مستقل عادت بن چکی ہے اور وہ سیٹ بیلٹ لگائے بغیر گاڑی اسٹارٹ بھی نہیں کرتیں۔اداکارہ نے کہا کہ انہیں سمجھ نہیں آ رہی کہ جن کاموں کا انہوں نے ارتکاب ہی نہیں کیا، ان پر بھی جرمانے کیوں کیے جا رہے ہیں، جبکہ اس صورتحال پر انہیں گھر میں ڈانٹ بھی سننا پڑ رہی ہے۔

بھارت کے معروف کامیڈی سیریل ‘تارک مہتا کا الٹا چشمہ’ میں اہم کردار ادا کرنے والے دلیپ جوشی نے ڈرامہ سیریل چھوڑنے کی افواہوں پر خاموشی توڑ دی۔حال ہی میں دلیپ جوشی نے میڈیا سے گفتگو کی اور اس دوران اپنے کامیڈی سیریل ‘تارک مہتا کا الٹا چشمہ’ کے 18 سال مکمل ہونے کے حوالے سے گفتگو کی۔دلیپ جوشی نے کہا کہ تارک مہتا کا الٹا چشمہ کو 18 سال ہوگئے ہیں اور لوگوں کی جانب سے اسے پسند کیا جا رہا ہے، یہ ناقابلِ یقین سفر ہے اور اسے کامیاب بنانے میں پوری ٹیم کی کارکردگی قابل تعریف ہے۔اداکار نے ڈرامہ چھوڑنے کی افواہوں پر کہا کہ انہوں نے بھی ایسی خبریں سنی ہیں، سوشل میڈیا اب پیسے کمانے کا ذریعہ بن گیا ہے، اپنے ویوز بڑھانے کیلئے لوگ کچھ بھی کہانیاں بنا دیتے ہیں لیکن افسوس ہوتا ہے جب نامور میڈیا ہاؤسز بغیر تصدیق کیے خبریں چھاپ دیتے ہیں، ایسا لگتا ہے کہ ایک ریس لگی ہوئی ہے جس میں سب دوڑ رہے ہیں۔انہوں نے مزید کہا کہ میں سوشل میڈیا انفلوئنسر یا سوشل میڈیا پر اپنے ویوز کمانے والے جو لوگ ہیں ان سے ہٹ کر میڈیا ہاؤسز سے درخواست کرنا چاہوں گا کہ جب بھی کوئی خبر پبلش کریں تو اس سے پہلے پروڈکشن ہاؤس یا جس شخص کے بارے میں بات کی جا رہی ہے اس سے ایک بار تصدیق ضرور کر لیا کریں۔

بالی وڈ اداکار عامر خان نے جان سے مارنے کی دھمکیوں کے بعد اپنی تیسری بیوی کے مذہب سے متعلق انکشاف کیا ہے۔بھارتی میڈیا کے مطابق ریاست مہاراشٹرا کے ایک وزیر نتیش رانے کی جانب سے عامر خان کی شادیوں کے تناظر میں انہیں ’لو جہاد کا برانڈ ایمبیسیڈر‘ قرار دیا گیا تھا۔ ایودھیا سے تعلق رکھنے والے ایک ہندو انتہا پسند رہنما جگد گرو پرمہنس آچاریہ نے عوامی سطح پر وزیر نتیش رانے کے بیان کی حمایت کی اور دعویٰ کیا کہ عامر خان کی ہندو خواتین سے شادیوں کا مقصد لو جہاد کو فروغ دینا تھا، یہ بات محض الزام نہیں بلکہ حقیقت کی عکاسی کرتی ہے۔اس کے ساتھ ہی ہندو انتہا پسند رہنما نے عامر خان کو قتل کرنے والے شخص کے لیے 5 کروڑ روپے کے انعام کا اعلان اور قتل کرنے والے شخص کو قانونی اخراجات برداشت کرنے کی بھی یقین دہانی کرائی۔میڈیا رپورٹس میں بتایا گیا ہے کہ جان سے مارنے کی دھمکیوں کے بعد عامر خان نے حال ہی میں دیے گئے انٹرویو میں اپنی تیسری بیوی کے مذہب سے متعلق بات کی اور بتایا کہ ان کی تیسری بیوی گوری اسپرٹ ہندو نہیں بلکہ وہ ایک عیسائی خاتون ہیں۔اداکار نے مزید کہا کہ میری پہلی بیوی رینا اور دوسری بیوی کرن نے بھی شادی کے بعد اپنا مذہب تبدیل نہیں کیا تھا، اب نہ ہی گوری نے ایسا کیا کیوں کے ہم نے ‘سول میرجز'(civil marriages) کی تھیں۔عامر خان کا کہنا تھا کہ سچ تو یہ ہے کہ ہمارا خاندان سب کو ساتھ لے کر چلنے والا خاندان ہے، میری دونوں بہنوں کی شادی ہندو سے ہوئی جب کہ میرے کزن منصور نے ایک عیسائی خاتون سے شادی کی اور میری بیٹی نے بھی ایک ہندو شخص سے شادی کی ہے۔واضح رہے کہ عامر خان نے اپنی سابقہ اہلیہ رینا دتہ سے 1986 میں شادی کی جو 2002 میں ختم ہوگئی جب کہ دوسری بیوی کرن راؤ سے 2005 میں شادی ہوئی جو 2021 میں ختم ہوئی۔اداکار نے تیسری شادی گوری اسپرٹ سے کی ہے۔

بھارتی اداکارہ شہناز گل نے راگھو جویل کے ساتھ ڈیٹینگ کی افواہوں پر خاموشی توڑ دی۔بھارتی میڈیا کے مطابق گزشتہ ہفتے دونوں اداکاروں نے ایک سالگرہ کی تقریب میں شرکت کی تھی، تقریب کے بعد راگھو کی جانب سے شہناز کو ہجوم سے بچا کر گاڑی کی جانب لے جاتے دیکھا گیا جس کی ویڈیو سوشل میڈیا پر وائرل ہوگئی۔شہناز گل اور راگھو جویل کی ویڈیو وائرل ہونے کے بعد دونوں اداکاروں کی ڈیٹینگ کی افواہوں نے زور پکڑ لیا۔حال ہی میں شہناز گل نے ایک انٹرویو دیا جس میں راگھو سے ڈیٹینگ کے متعلق سوال کیا گیا جس پر جواب دیتے ہوئے اداکارہ نے کہا کہ راگھو میرا اچھا دوست ہے، کوئی ذاتی سوال نہ پوچھا جائے۔اس کے ساتھ ہی شہناز گل نے سوال کا رخ موڑتے ہوئے مداحوں کو مخاطب کرتے ہوئے کہا کہ میرے دوست کی فلم آرہی ہے ‘بھائی تیرا اسٹار ہے’، آپ پلیز اس کو سپورٹ کریں، وہ میرا بہت اچھا دوست ہے اس کی فلم چلنی بہت ضروری ہے، وہ ہیرو کے طورپر پہلی بار اسکرین پر آرہا ہے، اس کا تعلق فلم انڈسٹری سے نہیں ہے وہ خود اپنی محنت سے آیا ہے۔واضح رہے کہ شہناز گل اور راگھو جویل 2023 میں بننے والی سلمان خان کی فلم ‘کس کا بھائی کس کی جان’ میں ایک ساتھ نظر آئے تھے۔

اداکارہ نادیہ خان ان دنوں شدید تنقید کی زد میں ہیں۔نادیہ نے ایک ڈرامے کے سین پر کہا تھا کہ اداکارہ سجل علی کا کردار خطرے سے بچنے کیلئے بھاگتے ہوئے صرف آہستہ آواز میں کوئی ہے کہہ رہا تھا، جبکہ ایسی صورتِ حال میں زور سے مدد کیلئے پکارنا چاہیے تھا۔انہوں نے اس منظر کی نقل بھی اتاری ،صبا فیصل نے لکھا کہ نادیہ خان! آپ اپنے گھر کے لیونگ روم میں نہیں بلکہ سوشل میڈیا پر بیٹھی ہیں، آپ اپنے ہی فنکاروں کے بارے میں اس طرح کیوں بات کرتی ہیں؟ آخر آپ کون ہوتی ہیں واحد سجل علی پر تنقید کرنے والی۔

“میرے والد نے ایک فلم بنائی تھی جس میں انہوں نے اپنی اور اپنے والدین کی جمع پونجی لگا دی، لیکن فلم ناکام ہوگئی۔ اس کے بعد ان کے اور میرے دادا دادی کے تعلقات بہت خراب ہوگئے۔ میرے والد کو اپنی والدہ کی قبر کا بھی علم نہیں تھا۔ تقریباً 30 سال بعد میں نے خواب میں اپنی دادی کو دیکھا اور یہ بات والد صاحب کو بتائی۔ پھر وہ ان کی قبر تلاش کرنے نکلے اور ایک قبر پر کھڑے ہو کر بہت روئے، لیکن بعد میں معلوم ہوا کہ وہ غلط قبر تھی۔ میرے والد بےحد بااصول اور ایماندار انسان تھے، مگر ایک بیٹے کے طور پر وہ اپنی والدہ کے ساتھ انصاف نہیں کر سکے۔”

پاکستان شوبز انڈسٹری کی سینئر اداکارہ بشریٰ انصاری نے ایک ٹی وی پروگرام میں اپنے والد، معروف صحافی احمد بشیر، کی زندگی کا ایسا پہلو بیان کیا جس نے سوشل میڈیا پر نئی بحث چھیڑ دی۔ ان کے انکشاف نے جہاں کئی لوگوں کو جذباتی کیا، وہیں متعدد صارفین نے ذاتی خاندانی معاملات عوام کے سامنے بیان کرنے پر انہیں تنقید کا نشانہ بھی بنایا۔ 

بشریٰ انصاری نے گفتگو کے دوران بتایا کہ ان کے والد اپنی اصول پسندی اور دیانت داری کے باعث ہمیشہ منفرد رہے، تاہم زندگی کے کچھ فیصلوں نے انہیں اپنے ہی خاندان سے دور کر دیا۔ انہوں نے ایک ناکام فلم کے بعد پیدا ہونے والے خاندانی اختلافات اور اپنی دادی کی قبر سے متعلق پیش آنے والا واقعہ بھی تفصیل سے بیان کیا، جسے سن کر پروگرام کے شرکا بھی خاموش ہوگئے۔

ادھر سوشل میڈیا پر اس گفتگو کے بعد مختلف آراء سامنے آئیں۔ بعض صارفین کا کہنا تھا کہ والدین کی ذاتی زندگی اور خاندانی معاملات کو عوامی سطح پر بیان نہیں کرنا چاہیے۔ کچھ افراد نے رائے دی کہ ممکن ہے اس وقت خاندان کے دوسرے افراد کا رویہ بھی درست نہ رہا ہو، جبکہ کئی لوگوں نے اسے غیر ضروری ذاتی انکشاف قرار دیتے ہوئے کہا کہ فنکاروں کو ایسے نجی واقعات عوام کے سامنے لانے سے گریز کرنا چاہیے۔