Category: تعلیم

خیبر پختونخوا ورکرز ویلفیئر بورڈ نے گرمیوں کی تعطیلات کے دوران اپنے زیر انتظام اسکولوں کے نان ٹیچنگ اسٹاف سے متعلق نئی ہدایات جاری کر دی ہیں۔

جاری کردہ مراسلے کے مطابق موسم گرما کی تعطیلات صرف تدریسی عملے (ٹیچنگ اسٹاف) کے لیے ہوں گی، جبکہ نان ٹیچنگ اسٹاف معمول کے مطابق اپنی ڈیوٹیاں انجام دے گا۔

مراسلے میں واضح کیا گیا ہے کہ ورکرز ویلفیئر بورڈ کے تمام اسکولوں میں نان ٹیچنگ ملازمین کی حاضری لازمی ہوگی اور انہیں مقررہ اوقات کے مطابق ڈیوٹی سرانجام دینا ہوگی۔

اگر کسی ملازم کو رخصت درکار ہو تو وہ متعلقہ قواعد و ضوابط کے مطابق باقاعدہ درخواست جمع کرانے کا پابند ہوگا، بغیر منظوری کے غیرحاضری قابل قبول نہیں ہوگی۔

ورکرز ویلفیئر بورڈ نے گرمیوں کی تعطیلات کے دوران اسکولوں کے اوقات کار بھی جاری کر دیے ہیں۔

مراسلے کے مطابق تعطیلات کے دوران تمام متعلقہ اسکول صبح 8 بجے سے دوپہر ایک بجے تک کھلے رہیں گے، جہاں نان ٹیچنگ اسٹاف اپنی ذمہ داریاں انجام دے گا اور دفتری امور معمول کے مطابق جاری رہیں گے۔

مزید ہدایت کی گئی ہے کہ تمام پرنسپلز ان احکامات پر سختی سے عملدرآمد یقینی بنائیں اور اس بات کو یقینی بنایا جائے کہ نان ٹیچنگ اسٹاف مقررہ اوقات میں اپنی حاضری یقینی بنائے۔

ورکرز ویلفیئر بورڈ نے واضح کیا ہے کہ جاری کردہ ہدایات کا مقصد تعطیلات کے دوران انتظامی امور، اسکولوں کی دیکھ بھال اور دفتری معاملات کو مؤثر انداز میں جاری رکھنا ہے تاکہ نئے تعلیمی سیشن کی تیاری بروقت مکمل کی جا سکے۔

جنید ریاض: محکمہ تعلیم نے کورونا کنوینس الاؤنس سے متعلق اہم وضاحت جاری کرتے ہوئے واضح کر دیا ہے کہ کورونا لاک ڈاؤن کے دوران ملازمین کو ادا کیے گئے کنوینس الاؤنس کی کسی قسم کی ریکوری نہیں کی جائے گی۔

ڈی ای او سیکنڈری ایجوکیشن لاہور نے اس حوالے سے تمام سرکاری تعلیمی اداروں کے سربراہان کو مراسلہ جاری کر دیا ہے۔ مراسلے میں ہدایت کی گئی ہے کہ تدریسی اور غیر تدریسی عملے کی تنخواہوں سے کورونا کنوینس الاؤنس کی مد میں کوئی کٹوتی نہ کی جائے۔

مراسلے کے مطابق 32 اے چالان کے ذریعے کورونا کنوینس الاؤنس واپس جمع کرانے کی بھی ضرورت نہیں ہے، جبکہ پہلے سے شروع کی گئی ریکوری یا جمع شدہ رقم سے متعلق تمام کارروائیاں فوری طور پر روک دی جائیں۔

محکمہ تعلیم نے واضح کیا ہے کہ یہ وضاحت محکمانہ اکاؤنٹس کمیٹی کے فیصلے کی روشنی میں جاری کی گئی ہے۔

ذرائع کا کہنا ہے کہ  ڈی ای او نے تمام اداروں کے سربراہان کو مراسلے پر سختی سے عمل درآمد یقینی بنانے اور اس معاملے میں غیر ضروری خط و کتابت سے گریز کرنے کی ہدایت بھی کی ہے، کیونکہ اس معاملے کو نمٹا دیا گیا ہے۔

( جنیدریاض)پرائمری سکولوں میں مصنوعی ذہانت (اے آئی) کا مضمون شامل کرنے کا معاملہ تاحال حتمی شکل اختیار نہ کر سکا، جس کے باعث کتابوں کی چھپائی میں بھی تاخیر کا سامنا ہے۔

 ذرائع کے مطابق پنجاب کریکولم اینڈ ٹیکسٹ بک بورڈ کی جانب سے اے آئی مضمون کو ابھی تک نوٹیفائی نہیں کیا گیا، جس کی وجہ سے نصابی کتب کی تیاری اور چھپائی کا عمل التواء میں پڑ گیا ہے۔

 ذرائع کا کہنا ہے کہ پہلی سے پانچویں جماعت تک اے آئی مضمون پڑھانے کی منظوری بورڈ آف گورنرز دے چکا ہے، تاہم سرکاری پرائمری سکولوں میں اے آئی لیبز کی عدم دستیابی کے باعث اس منصوبے پر عملدرآمد میں مشکلات پیش آ رہی ہیں۔

 حکام کے مطابق اے آئی مضمون کو مکمل طور پر نافذ کرنے کے لیے پرائمری سکولوں میں کروڑوں روپے کی لاگت سے لیبز قائم کرنا ہوں گی، جبکہ موجودہ صورتحال میں اے آئی کو مکمل مضمون کے بجائے بطور چیپٹر شامل کرنے کی تجویز زیر غور ہے۔

 پیکٹاء حکام کا کہنا ہے کہ پرائمری سکولوں میں اے آئی مضمون پڑھانے کے حوالے سے معاملات زیر غور ہیں اور جلد ہی اس حوالے سے نوٹیفکیشن جاری کر دیا جائے گا۔

سعودی ڈیٹا اینڈ آرٹیفیشل انٹیلی جنس اتھارٹی (سدایا) نے وزارت تعلیم کے اشتراک سے اس سال جنرل ایجوکیشن کے طلبہ کے لیے یونیفائیڈ ایپ ’توکلنا‘ کے ذریعے تعلیمی نتائج تک رسائی ممکن بنا دی ہے۔

اس اقدام کا مقصد ڈیجیٹل تبدیلی کو فروغ دینا، والدین اور طلبہ کے لیے ایک محفوظ اور مربوط ڈیجیٹل پلیٹ فارم کے ذریعے تعلیمی خدمات تک رسائی کو آسان بنانا ہے۔

یہ سروس سرکاری اداروں کے درمیان جاری ہم آہنگی اور ایسی جدید تیکنیکی حل کی فراہمی کا حصہ ہے جو اس سے فائدہ اٹھانے والوں بشمول شہریوں اور رہائشیوں کے تجربے کو آسان بناتے ہیں۔

یہ توکلنا ایپ کے ذریعے کسی بھی وقت اور کسی بھی جگہ خدمات تک رسائی فراہم کرتی ہے جو مملکت میں ڈیجیٹل تبدیلی کو فروغ دینے سے متعلق وژن 2030 کے اہداف سے ہم آہنگ ہے۔

جنید ریاض : پنجاب کے پرائیویٹ سکولوں کیلئے بلڈنگ فٹنس سرٹیفکیٹ پالیسی میں نرمی کردی۔

محکمہ سکول ایجوکیشن کا پرائیویٹ سکولوں کو بڑا ریلیف مل گیا ۔ پرائیویٹ سکول اب پاکستان انجینئرنگ کونسل کے رجسٹرڈ انجینئر یا فرم سے فٹنس سرٹیفکیٹ حاصل کر سکیں گے۔بلڈنگ فٹنس سرٹیفکیٹ کیلئے سی اینڈ ڈبلیو کی شرط نرم، متبادل آپشن منظور  ہوگیا ۔ 

سی ای او ایجوکیشن طارق محمود نے کہا سکول رجسٹریشن کے عمل میں بلڈنگ فٹنس سرٹیفکیٹ لازمی ہے،طلبا اور عملے کی حفاظت کیلئے نئے انتظامات کرنا ضروری ہیں،لاہور سمیت پنجاب بھر کے پرائیویٹ تعلیمی ادارے فٹنس سرٹیفکیٹ فوری حاصل کریں۔

بلڈنگ فٹنس سرٹیفکیٹ پاکستان انجینئرنگ کونسل کے رجسٹرڈ سول انجینئر سے بھی حاصل کیا جا سکے گا۔محکمہ سکول ایجوکیشن نے ضلعی رجسٹریشن اتھارٹیز کو احکامات پر عملدرآمد یقینی بنانے کا حکم دے دیا ۔

ویب ڈیسک:کاہنہ اور باغبانپورہ میں پیش آنے والے حادثات کے بعد پنجاب حکومت نے نجی تعلیمی اداروں کی عمارتوں کی حفاظت یقینی بنانے کے لیے بلڈنگ فٹنس سے متعلق نیا طریقۂ کار نافذ کر دیا ہے۔ نئی ہدایات کے تحت اسکولوں کی رجسٹریشن کو عمارت کے حفاظتی معیار سے مشروط کر دیا گیا ہے۔

محکمہ مواصلات و تعمیرات (سی اینڈ ڈبلیو) کی جانب سے بلڈنگ فٹنس سرٹیفکیٹ جاری نہ کیے جانے کے باعث حکومت نے پالیسی میں تبدیلی کرتے ہوئے ہدایت کی ہے کہ تمام نجی اسکول پاکستان انجینئرنگ کونسل (PEC) کے رجسٹرڈ سول انجینئر یا رجسٹرڈ انجینئرنگ فرم سے بلڈنگ فٹنس سرٹیفکیٹ حاصل کریں۔

محکمہ اسکول ایجوکیشن نے اس حوالے سے تمام ڈپٹی کمشنرز اور چیف ایگزیکٹو آفیسرز ایجوکیشن کو مراسلہ جاری کرتے ہوئے نئی پالیسی پر سختی سے عملدرآمد یقینی بنانے کی ہدایت کی ہے۔

مراسلے میں واضح کیا گیا ہے کہ بلڈنگ فٹنس سرٹیفکیٹ کے بغیر کسی بھی نجی اسکول کی رجسٹریشن مکمل نہیں کی جائے گی۔ اس کے ساتھ تمام نجی تعلیمی اداروں کو اپنی عمارتوں کی حفاظت سے متعلق قانونی تقاضے پورے کرنے اور مقررہ ضوابط پر عمل کرنے کا بھی پابند بنایا گیا ہے۔

علی ساہی:ڈی آئی جی ٹریفک پنجاب کی ہدایت پر تعلیمی اداروں میں جووینائل ڈرائیونگ پرمٹ سے متعلق خصوصی آگاہی مہم شروع کرنے کا فیصلہ کر لیا گیا ہے۔

ایس ایس پی ٹریفک سید ندیم عباس نے اس حوالے سے تمام سی ٹی اوز اور ڈی پی اوز کو مراسلہ جاری کرتے ہوئے ہدایت کی ہے کہ اسکولوں اور کالجوں میں طلبہ کو جووینائل ڈرائیونگ پرمٹ، اس کے حصول کے طریقہ کار اور قانونی تقاضوں سے آگاہ کیا جائے۔

مراسلے کے مطابق اگست میں تعلیمی ادارے کھلنے کے بعد روڈ سیفٹی آگاہی مہم چلائی جائے گی، جس کے تحت محفوظ ڈرائیونگ، ٹریفک قوانین اور ذمہ دارانہ طرزِ عمل پر خصوصی سیشنز منعقد کیے جائیں گے۔

حکام کا کہنا ہے کہ اہل طلبہ کو مقررہ طریقہ کار کے تحت جووینائل پرمٹ حاصل کرنے کی ترغیب دی جائے گی، جبکہ تمام اضلاع میں اس آگاہی مہم کو مؤثر انداز میں چلانے کی ہدایت بھی جاری کر دی گئی ہے۔

(رابیل سدید)سندھ کے سرکاری اسکولوں میں داخلہ نظام ڈیجیٹل کرنے کا فیصلہ کرلیاگیا۔

ہر طالب علم کو ب فارم سے منسلک منفرد ڈیجیٹل شناخت ملے گی،نادرا کے تعاون سے طلبہ کا جدید ڈیجیٹل ریکارڈ سسٹم قائم ہوگا۔

نئے نظام کے تحت داخلہ، حاضری اور امتحانی ریکارڈ ایک ہی پروفائل میں محفوظ ہوگا۔

نادرا کے تعاون سے طلبہ کے ریکارڈ کا مربوط ڈیجیٹل نظام قائم کیا جائے گا،ڈیجیٹل نظام سے فرضی اور دوہرے داخلوں کے خاتمے میں مدد ملے گی،اسکول تبدیل کرنے یا تعلیم چھوڑنے والے طلبہ کا ریکارڈ بھی آسانی سے ٹریک کیا جا سکے گا۔

سندھ کے 600 اسکولوں میں ڈیجیٹل داخلہ رجسٹریشن کا عمل پہلے ہی جاری ہے،ڈیجیٹل داخلہ نظام مرحلہ وار تمام سرکاری اور سرکاری معاونت یافتہ اسکولوں تک توسیع پائے گا۔

صوبائی وزیر تعلیم کااس حوالے سے کہناہے کہ ٹیکنالوجی سے شفافیت بڑھے گی، انسانی مداخلت کم اور تعلیمی منصوبہ بندی مزید مؤثر ہوگی،نادرا نے منصوبے کی تکمیل کے لیے سندھ حکومت کو مکمل تکنیکی تعاون کی یقین دہانی کرا دی ہے۔

  جنیدریاض : قیمتی سامان کی چوری کے بڑھتے ہوئے واقعات کے پیش نظر محکمہ سکول ایجوکیشن نے تمام سرکاری سکولوں میں سی سی ٹی وی کیمرے نصب کرنے کے احکامات جاری کر دیے ہیں۔

محکمہ تعلیم کے مطابق گرمیوں کی تعطیلات کے دوران ہر صورت تمام سکولوں میں ہائی کوالٹی سی سی ٹی وی کیمرے نصب کیے جائیں تاکہ رات کے وقت بھی مؤثر نگرانی ممکن ہو سکے۔

حکام کا کہنا ہے کہ حالیہ دنوں میں سکولوں سے سولر پلیٹس، کمپیوٹرز اور دیگر قیمتی سامان چوری ہونے کے متعدد واقعات رپورٹ ہوئے ہیں، جس کے بعد تمام متعلقہ اتھارٹیز کو احکامات پر سختی سے عملدرآمد کی ہدایت جاری کر دی گئی ہے۔

محکمہ سکول ایجوکیشن کے مطابق تعطیلات کے بعد طلبہ کی حاضری بھی بائیومیٹرک سسٹم کے ذریعے یقینی بنائی جائے گی تاکہ سکولوں میں نگرانی اور نظم و ضبط کو مزید مؤثر بنایا جا سکے۔

جنید ریاض: پنجاب ایجوکیشن کریکولم، ٹریننگ اینڈ اسیسمنٹ اتھارٹی ( پیکٹا) نے مختلف شعبوں کے لیے 7 ڈائریکٹرز کا انتخاب کر لیا ہے، جنہیں مجموعی طور پر ماہانہ ساڑھے 52 لاکھ روپے تنخواہوں کی ادائیگی کی جائے گی۔

ذرائع کے مطابق منتخب ہونے والے ہر ڈائریکٹر کو ماہانہ ساڑھے 7 لاکھ روپے لم سم تنخواہ دی جائے گی، جبکہ ان تنخواہوں کی ادائیگی کے لیے کابینہ کمیٹی سے باقاعدہ منظوری بھی حاصل کر لی گئی ہے۔

سرکاری ٹیچنگ ہسپتالوں میں میڈیکولیگل رپورٹس آن لائن کرنے کا فیصلہ
منتخب ہونے والے افسران میں ڈائریکٹر ریسرچ عالیہ حسنین، ڈائریکٹر پروکیورمنٹ محمد افضال، ڈائریکٹر سکول انوائرمنٹ نوشین خالد، ڈائریکٹر ٹریننگ اینڈ سرٹیفکیٹ سندس خان، ڈائریکٹر کریکولم سعدیہ سردار، ڈائریکٹر اسیسمنٹ محسن عباس اور ڈائریکٹر سکول کونسل بابر مسعود شامل ہیں۔

دوسری جانب ڈائریکٹر ایڈمن، ڈائریکٹر فنانس اور ڈائریکٹر آئی ٹی کی تقرری کا عمل تاحال مکمل نہیں ہو سکا۔ ذرائع کے مطابق ان عہدوں پر تعینات ہونے والے افسران کو بھی ماہانہ ساڑھے 7 لاکھ روپے لم سم تنخواہ دی جائے گی۔