امریکی وزارت خزانہ کی جانب سے تاریخ میں پہلی بار کسی برسرِ اقتدار صدر کی تصویر نقش کرنے کی تیاریاں شروع کر دی گئی ہیں.
صدر ٹرمپ اس سے قبل وفاقی عمارتوں، ایک ہوائی اڈے، پْلوں، کچھ پاسپورٹس پر بھی اپنا نام یا شبیہ (تصویر) نقش کروا چکے ہیں تاہم اب امریکی ٹکسال ان کے چہرے والا ایک ڈالر کا سکہ تیار کر رہا ہے.
وزیر خزانہ سکاٹ بیسنٹ نے گذشتہ روز نئے گولڈ کوائن کے ڈیزائن کی رونمائی کی جس کے سامنے والے حصے پر ٹرمپ کے چہرے کی تصویر کے ساتھ جملہ ہمارا خدا پر ایمان اور1776-2026 کی تاریخ درج ہے۔
امریکا میں طالب علم کے ریکارڈ 11.99 جی پی اے حاصل کرنے کے بعد گریڈ پوائنٹ ایوریج کا نظام تبدیل کیا جا رہا ہے۔
اسٹین برینر ہائی اسکول سے ویلڈیکٹورین کی حیثیت سے گریجویٹ ہونے والے ویبھاو بھاسکر نے 11.99 جی پی اے حاصل کی۔ اس طرح انہوں نے 11.84 جی پی اے کا ریاستی ریکارڈ توڑ دیا، جو 2022 میں گیتھر ہائی اسکول کے گریجویٹ ڈیلن مزارڈ نے قائم کیا تھا۔
ویبھاو بھاسکر اتنی بھاری جی پی اے حاصل کرنے میں اس لیے کامیاب رہے کیونکہ ہِلزبرو کاؤنٹی کی پالیسی کے تحت ایڈوانسڈ پلیسمنٹ اور ڈوئل انرولمنٹ کورسز کے لیے معمول کے 4.0 اسکور سے زیادہ اضافی پوائنٹس دیے جاتے تھے۔
طالب علم نے ہائی اسکول کے دوران 20 اے پی کورسز کیے جبکہ یونیورسٹی آف فلوریڈا کے آن لائن پروگرام کے ذریعے 24 ڈوئل انرولمنٹ کالج کورسز بھی مکمل کیے جو ایک ایسوسی ایٹ ڈگری حاصل کرنے کے لیے کافی تھے۔
مقامی میڈیا سے گفتگو کرتے ہوئے ویبھاو بھاسکر نے کہا کہ جب انہوں نے یہ ذہن بنا لیا کہ انہیں سب سے اوپر رہنا ہے، تو انہوں نے ہر موقع سے فائدہ اٹھایا۔ انہوں نے سب سے مشکل مضامین لیے، اپنے اسکول کا تقریباً پورا نصاب مکمل کیا اور پھر دیکھا کہ اس کے بعد وہ مزید کیا کر سکتے ہیں۔
جاپان میں پالتو جانوروں کی تعداد بچوں سے زیادہ ہوگئی۔
غیر ملکی میڈیا رپورٹ کے مطابق مشرقی ایشیائی ملک میں شرح پیدائش بھی مسلسل گر رہی ہے جس کے بعد بے بی پروڈکٹس بنانے والی کمپنیاں بھی اب پالتو جانوروں کی خوراک اور ڈائپر زیادہ بنا رہی ہیں۔
جاپان کی پیٹ کیئر انڈسٹری، ساڑھے پانچ ارب ڈالر تک پہنچ گئی۔ بچوں کی مصنوعات بنانے والی کمپنیاں اب کتوں اور بلیوں کے لیے کیریئر، ڈائپر اور دیگر مصنوعات بنا رہی ہیں۔
ماہرین کے مطابق جاپان میں پالتو جانور اب صرف جانور نہیں بلکہ خاندان کے بچوں جیسا درجہ رکھتے ہیں۔
چین کے شہر گوانگژو میں واقع ساؤتھ چائنا ایگریکلچرل یونیورسٹی میں ایک طالب علم مصنوعی ذہانت (اے آئی) سے لیس اسمارٹ چشمے کے ذریعے امتحان میں نقل کرتے ہوئے پکڑا گیا۔
رپورٹس کے مطابق یکم جولائی کو امتحان شروع ہونے کے تقریباً 10 منٹ بعد نگران عملے نے طالب علم کے چشمے کے لینز میں سبز روشنی چمکتی دیکھی۔ شک ہونے پر اس سے چشمہ اتارنے کو کہا گیا، جس کے بعد اس نے اعتراف کیا کہ وہ اے آئی اسمارٹ چشمہ استعمال کر رہا تھا۔
چائنا نیوز وِیکلی کے مطابق طالب علم لیکی اسمارٹ گلاسز نامی چشمہ استعمال کر رہا تھا جو گزشتہ سال ستمبر میں متعارف کرایا گیا تھا۔ یہ چشمہ ڈِیپ سِیک، ٹونگیی چیانوین، ژیپو اور ڈوباؤ سمیت چار بڑے اے آئی ماڈلز سے لیس ہے اور تصاویر کی مدد سے سوالات کا تجزیہ کر کے فوری جواب فراہم کرنے کی صلاحیت رکھتا ہے۔
رپورٹ کے مطابق طالب علم صرف چشمے کے فریم کو کنپٹی کے قریب چھو کر امتحانی سوالات کی تصویر لیتا تھا، جس کے بعد اے آئی اسے جوابات فراہم کر دیتا تھا۔ اگرچہ تصویر لیتے وقت فریم پر موجود ایل ای ڈی لائٹ کو ڈھانپ لیا جاتا تھا، تاہم مخصوص زاویوں سے لینز میں سبز روشنی نظر آ جاتی تھی، جس سے اس کی چوری پکڑی گئی۔
یہ واقعہ سوشل میڈیا پر وائرل ہونے کے بعد بعض طلبا نے دعویٰ کیا کہ سستے سن شیڈ اسٹیکرز لگا کر اس سبز روشنی کو بھی چھپایا جا سکتا ہے۔
آن لائن پلیٹ فارمز پر ایسے اشتہارات میں بھی اضافہ دیکھا گیا ہے جن میں طلبا کو تقریباً 200 چینی یوآن کے عوض اے آئی اسمارٹ چشمے کرائے پر دینے کی پیشکش کی جا رہی ہے جبکہ بعض فروخت کنندگان انہیں خاموش اور کم روشنی کے موڈ میں استعمال کرنے کی تربیت بھی فراہم کر رہے ہیں۔
اونٹاریو پولیس نے شہریوں کو خبردار کیا ہے کہ اگر انہیں کسی قسم کا دھماکا خیز مواد یا پرانا فوجی اسلحہ ملے تو اسے خود اٹھا کر پولیس اسٹیشن نہ لائیں۔
یہ ہدایت اس وقت جاری کی گئی جب ایک شہری نے جمعہ کے روز دوسری جنگِ عظیم کا ایک غیر پھٹا ہوا دستی بم اوٹاوا میں اونٹاریو پروونشل پولیس کے ڈٹیچمنٹ میں جمع کرا دیا۔
او پی پی کے مشرقی ریجن نے سوشل میڈیا پر جاری بیان میں کہا کہ اس طرح کی اشیا کو خود منتقل کرنا نہایت خطرناک ہو سکتا ہے اور اس سے لانے والے شخص سمیت آس پاس موجود افراد کی جان بھی خطرے میں پڑ سکتی ہے۔
پولیس نے شہریوں کو ہدایت کی ہے کہ اگر کہیں دھماکا خیز مواد یا مشتبہ فوجی سامان ملے تو اسے وہیں چھوڑ دیں اور فوری طور پر پولیس کو اطلاع دیں۔
بیان کے مطابق پولیس اپنی ایکسپلوسوز ڈسپوزل یونٹ کو موقع پر بھیجے گی جو محفوظ طریقے سے اس مواد کو ناکارہ بنائے گی یا تلف کرے گی۔
آبنائے ہرمز پر کنٹرول کی خاطر ایران اور امریکا کے مابین جنگ نے یہ حقیقت آشکار کر دی کہ عالمی معیشت میں سمندری راستوں کا عنصر انتہائی اہم ہو چکاہے، سمندری راستوں سے دنیا بھر میں80 سے 90 فیصد سامان ایک جگہ سے دوسری جگہ منتقل ہوتا۔
دنیا کی معیشت بڑی حد تک چند اہم بحری راستوں پر منحصر ہے جو عالمی تجارت، تیل و گیس کی ترسیل اور خام مال کی نقل و حمل کو ممکن بناتے ہیں۔ ماہرین کے مطابق ان میں سے کسی ایک اہم سمندری گزرگاہ میں بھی خلل پیدا ہو جائے تو اس کے اثرات عالمی توانائی کی قیمتوں، مہنگائی اور سپلائی چین پر پڑتے ہیں۔
آبنائے ہرمز: آبنائے ہرمز ایران اور عمان کے درمیان واقع ہے اور خلیج عرب کو بحیرہ عرب سے ملاتی ہے۔ اس راستے سے دنیا کے تقریباً 20 فیصد تیل کی ترسیل ہوتی ہے جس کی یومیہ مالیت تقریباً 1.7 ارب ڈالر بنتی ہے۔ سعودی عرب، متحدہ عرب امارات اور عراق جیسے بڑے تیل پیدا کرنے والے ممالک اپنی بڑی مقدار میں تیل اسی راستے سے عالمی منڈیوں تک پہنچاتے ہیں۔
آبنائے ملاکا: ملائیشیا اور انڈونیشیا کے درمیان واقع آبنائے ملاکا بحرِ ہند کو بحرالکاہل سے ملاتی ہے۔ یہ ایشیا کی معیشتوں کے لیے نہایت اہم راستہ ہے جہاں سے عالمی سمندری تیل تجارت کا تقریباً 29 فیصد گزرتا ہے۔ اس راستے میں رکاوٹ ایشیائی معیشتوں اور عالمی سپلائی چین کے لیے بڑا دھچکا ثابت ہو سکتی ہے۔
آبنائے ہرمز مصر میں واقع نہر سویز یورپ اور ایشیا کے درمیان سفر کو مختصر بناتی ہے۔ عالمی سمندری تیل کی تقریباً 10 فیصد ترسیل اور مائع قدرتی گیس کی بڑی مقدار اسی راستے سے گزرتی ہے۔ 2021 میں ایک بڑے کارگو جہاز کے پھنسنے سے اس نہر کی بندش نے عالمی تجارت کو شدید متاثر کیا تھا۔
نہر پاناما: نہر پاناما بحرِ اوقیانوس اور بحرالکاہل کو ملاتی ہے اور خاص طور پر امریکا کے مشرقی اور مغربی ساحلوں کے درمیان تجارت کے لیے انتہائی اہم ہے۔ یہاں رکاوٹ پیدا ہونے کی صورت میں جہازوں کو جنوبی امریکا کے گرد طویل راستہ اختیار کرنا پڑتا ہے جس سے اخراجات اور وقت دونوں بڑھ جاتے ہیں۔
آبنائے باب المندب: یمن کے قریب واقع آبنائے باب المندب بحیرہ احمر کو خلیج عدن سے ملاتی ہے اور نہر سویز کے لیے ایک اہم راستہ ہے۔ اس علاقے میں سکیورٹی خدشات اور حملوں کے باعث ماضی میں جہاز رانی متاثر ہوتی رہی ہے۔
آبنائے باسفورس: ترکی میں واقع آبنائے باسفورس دنیا کی تنگ ترین بین الاقوامی گزرگاہوں میں سے ایک ہے جو بحیرہ اسود کو بحیرہ روم سے ملاتی ہے۔ روس، قازقستان اور آذربائیجان سے آنے والے تیل کی بڑی مقدار اسی راستے سے گزرتی ہے۔
فیفا ورلڈ کپ 2026 کے کوارٹر فائنل میں انگلینڈ نے ناروے کو 1-2 سے شکست دے کر سیمی فائنل میں جگہ تو بنالی، تاہم میچ کے بعد سب سے زیادہ توجہ برطانیہ کی قومی ایئرلائن برٹش ایئرویز اور ناروے کی کم لاگت ایئرلائن نارویجن کے درمیان ہونے والی ایک دلچسپ سوشل میڈیا شرط نے حاصل کی، جسے دنیا بھر میں صارفین نے کھیل کے جذبے کی خوبصورت مثال قرار دیا۔
میچ سے قبل دونوں ایئرلائنز نے دوستانہ انداز میں طے کیا تھا کہ جس ملک کی ٹیم ہارے گی، اس کی ایئرلائن 24 گھنٹوں کے لیے اپنی انسٹاگرام پروفائل تصویر تبدیل کرکے مخالف ایئرلائن کا لوگو لگائے گی۔ انگلینڈ کی کامیابی کے بعد نارویجن نے اپنے وعدے کے مطابق برٹش ایئرویز کا لوگو اپنی پروفائل پر آویزاں کردیا، جس کے بعد یہ منفرد مہم سوشل میڈیا پر تیزی سے وائرل ہو گئی۔
اس دلچسپ مقابلے کی ابتدا اس وقت ہوئی جب نارویجن نے انسٹاگرام پر برٹش ایئرویز کو ٹیگ کرتے ہوئے شرط پیش کی کہ اگر ناروے کامیاب رہا تو برٹش ایئرویز اپنی پروفائل تصویر تبدیل کرے گی، جبکہ انگلینڈ کی جیت کی صورت میں یہی کام نارویجن کرے گی۔ اس پر برٹش ایئرویز نے مزاحیہ انداز میں جواب دیا، ’’ایسی شرط مت لگاؤ جو جیت نہ سکو۔‘‘ دونوں برانڈز کے درمیان یہ دوستانہ مکالمہ دیکھتے ہی دیکھتے سوشل میڈیا صارفین، دیگر ایئرلائنز، ایئرپورٹس، ٹریول برانڈز اور مختلف معروف اکاؤنٹس کی توجہ کا مرکز بن گیا۔
انگلینڈ کی فتح کے بعد نارویجن نے نہ صرف اپنی شرط پوری کی بلکہ برٹش ایئرویز کو مبارک باد دیتے ہوئے لکھا کہ شاندار مقابلے پر مبارک ہو، اب ورلڈ کپ بھی اپنے نام کر کے دکھائیں۔ اس کے ساتھ انہوں نے یہ بھی کہا کہ امید ہے اس دوستانہ مقابلے سے دونوں اداروں کے تعلقات مزید مضبوط ہوں گے اور ان کی سوشل میڈیا ٹیم اب برٹش ایئرویز کے دفتر آنا بھی پسند کرے گی۔
لوگو تبدیل کرنے کے بعد نارویجن نے ایک اور دلچسپ تبصرہ کرتے ہوئے لکھا، ’’ذرا رُکیے… کیا اگلے 24 گھنٹوں تک لوگ ہماری ہر پوسٹ کو برٹش ایئرویز کی پوسٹ سمجھیں گے؟‘‘ اس ایک جملے نے ہزاروں صارفین کو محظوظ کیا اور اس پر بڑی تعداد میں مزاحیہ تبصرے سامنے آئے۔
دوسری جانب برٹش ایئرویز نے بھی کھیل کے مثبت جذبے کو سراہتے ہوئے اپنی پوسٹ میں لکھا، ’’90 منٹ کے لیے حریف، لیکن ہمیشہ کے لیے دوست۔‘‘ اس کے جواب میں نارویجن نے شکریہ ادا کرتے ہوئے کہا کہ یہ ایک یادگار مقابلہ تھا اور اب وہ انگلینڈ کو ورلڈ کپ جیتتے دیکھنا چاہتے ہیں۔
مارول کامکس کے مشہور سپر ہیرو آئرن مین کی پہلی جھلک پیش کرنے والا اصل کامک آرٹ ورک ریکارڈ 38لاکھ 75 ہزار امریکی ڈالر میں نیلام ہوگیا۔
ہیریٹیج آکشنز کے مطابق فنکار ڈان ہیک کا تیار کردہ یہ اصل آرٹ ورک مارچ 1963 میں شائع ہونے والی Tales of Suspense No. 39 کے پہلے صفحے پر موجود ہے، جسے جمعہ کے روز نیلام کیا گیا۔
ہیریٹیج آکشنز کے نیویارک میں کامکس اور کامک آرٹ کے ڈائریکٹر جو مینارینو نے کہا کہ ابتدائی مارول کامکس کے ایسے اصل صفحات انتہائی نایاب ہیں اور جب بھی ان میں سے کوئی مارکیٹ میں آتا ہے تو خریدار غیرمعمولی دلچسپی کا مظاہرہ کرتے ہیں۔
انہوں نے بتایا کہ نیلامی کے دوران چھ بولی دہندگان کے درمیان سخت مقابلہ ہوا اور بولی 30 لاکھ ڈالر سے تجاوز کرنے کے بعد بھی بڑھتی رہی۔
اس فروخت کے ساتھ اصل کامک آرٹ کے کسی بھی نمونے کی سب سے زیادہ قیمت کا نیا عالمی ریکارڈ قائم ہوگیا۔ اس سے قبل یہ ریکارڈ 33 لاکھ 60 ہزار امریکی ڈالر کا تھا، جو 1984 کی Marvel Super-Heroes Secret Wars No. 8 میں اسپائیڈر مین کے سیاہ لباس کی پہلی جھلک پر مبنی مائیک زیک کے آرٹ ورک نے جنوری 2022 میں قائم کیا تھا۔
ایک نئی تحقیق میں انکشاف ہوا ہے کہ رواں ورلڈ کپ میں ریڈ کارڈز کی تعداد گزشتہ دو ٹورنامنٹس کے مقابلے میں تین گنا سے بھی زیادہ ہو گئی ہے، جس کی بڑی وجہ ویڈیو اسسٹنٹ ریفری (وی اے آر) ٹیکنالوجی میں ہونے والی بہتری قرار دی جا رہی ہے۔
نارتھ ایسٹرن یونیورسٹی کے محققین نے ورلڈ کپ میچز کے اعداد و شمار کا جائزہ لیا جس کے مطابق شمالی امریکا میں جاری ٹورنامنٹ کے دوران اب تک 14 ریڈ کارڈز دکھائے جا چکے ہیں جبکہ 2018 اور 2022 کے ورلڈ کپ میں مجموعی طور پر صرف 4، 4 ریڈ کارڈز جاری کیے گئے تھے۔
تحقیق کے مطابق کم از کم تین ایسے واقعات سامنے آئے جن میں ریفری نے ابتدا میں یلو کارڈ دیا لیکن وی اے آر فوٹیج دیکھنے کے بعد فیصلہ تبدیل کرتے ہوئے ریڈ کارڈ جاری کر دیا۔
محققین کا کہنا ہے کہ وی اے آر کی بہتر ٹیکنالوجی ریفریز کو خطرناک فاؤلز اور سنگین خلاف ورزیوں کی زیادہ درست نشاندہی کرنے میں مدد دے رہی ہے، جس کے باعث ریڈ کارڈز کی تعداد میں نمایاں اضافہ دیکھنے میں آیا ہے۔
دلچسپ بات یہ ہے کہ تحقیق کے مطابق جہاں ریڈ کارڈز میں اضافہ ہوا ہے، وہیں یلو کارڈز کی اوسط تعداد میں کمی آئی ہے۔ رواں ٹورنامنٹ میں فی میچ اوسطاً 2.52 یلو کارڈز جاری ہوئے جبکہ 2018 میں یہ اوسط 3.20 اور 2022 میں 3.50 فی میچ تھی۔
امریکا کے معروف ریکارڈ ہولڈر ڈیوڈ رش نے ایک منفرد کارنامہ انجام دیتے ہوئے 125 ٹی شرٹس پہن کر میراتھن چھ گھنٹے سے کم وقت میں مکمل کر لی۔
ریاست آئیڈاہو سے تعلق رکھنے والے ڈیوڈ رش (جو بیک وقت سب سے زیادہ گنیز ورلڈ ریکارڈز رکھنے کے حوالے سے مشہور ہیں) نے یہ چیلنج اس وقت قبول کیا جب انہوں نے 2025 کے فیمس آئیڈاہو پوٹیٹو ہاف میراتھن میں 137 ٹی شرٹس پہن کر ہاف میراتھن کا ریکارڈ قائم کیا تھا۔
ڈیوڈ رش نے بتایا کہ ہاف میراتھن میں کامیابی کے بعد انہیں لگا کہ اگر 13 میل کا فاصلہ اس حالت میں طے کیا جا سکتا ہے تو مکمل میراتھن بھی آسانی سے دوڑی جا سکتی ہے۔ تاہم، بعد میں انہیں اندازہ ہوا کہ یہ توقع حقیقت سے کہیں زیادہ مشکل تھی۔
ریکارڈ کی تیاری کے لیے انہوں نے کئی ماہ تک اضافی وزن اور متعدد تہوں والے کپڑے پہن کر خصوصی تربیت حاصل کی۔
ڈیوڈ رش نے 16 مئی 2026 کو منعقد ہونے والی وائے ایم سی اے فیمس آئیڈاہو پوٹیٹو میں 125 ٹی شرٹس پہن کر میراتھن مکمل کی اور چھ گھنٹے سے کم وقت میں یہ منفرد عالمی ریکارڈ اپنے نام کر لیا۔
گنیز ورلڈ ریکارڈز نے کی جانب سے باضابطہ طور پر اس بات کی تصدیق کر دی گئی کہ ڈیوڈ رش نے 100 ٹی شرٹس پہننے کا سابقہ عالمی ریکارڈ توڑ دیا ہے۔