گوگل نے دنیا بھر کے جی میل صارفین کے لیے نیا اے آئی اپ ڈیٹ جاری کر دیا

کیلیفورنیا: گوگل نے جی میل صارفین کے لیے ایک نئی اے آئی سہولت متعارف کروا دی ہے، جس کے ذریعے طویل ای میلز کا خلاصہ چند لمحوں میں پڑھا جا سکے گا، جس سے ای میلز سمجھنا پہلے سے کہیں زیادہ آسان ہو جائے گا۔

ٹیکنالوجی رپورٹس کے مطابق یہ فیچر گوگل کے جیمنائی اے آئی سے چلتا ہے اور اسے بتدریج دنیا بھر کے مفت جی میل اکاؤنٹس تک پہنچایا جا رہا ہے۔ ابتدائی مرحلے میں یہ سہولت صرف کچھ مخصوص ای میل تھریڈز پر دستیاب ہوگی۔

اس نئے فیچر کی مدد سے صارفین پوری ای میل پڑھے بغیر اہم نکات جان سکیں گے، جبکہ جیمنائی سے ای میل کے بارے میں سوالات بھی کیے جا سکیں گے۔

گوگل کا کہنا ہے کہ فی الحال یہ فیچر انگریزی، فرانسیسی، جرمن، اطالوی، جاپانی، کوریائی، پرتگالی اور ہسپانوی زبانوں میں دستیاب ہے، جبکہ مستقبل میں مزید زبانیں بھی شامل کیے جانے کا امکان ہے۔

صارفین اگر اس اے آئی فیچر کو استعمال نہیں کرنا چاہتے تو جی میل کی سیٹنگز میں موجود گوگل ورک اسپیس اسمارٹ فیچرز کے ذریعے اسے باآسانی غیر فعال کر سکتے ہیں۔