پاکستان اور کویت نے جمعرات کو دونوں ممالک کے درمیان فوجی تعاون کو نمایاں طور پر بڑھانے کے لیے ’’پروٹوکول معاہدہ 2026‘‘ پر دستخط کیے ہیں۔ وزارتِ دفاع کے مطابق معاہدے کا مقصد دونوں ممالک کے درمیان فوجی تعاون کو مزید مؤثر بنانا ہے۔
یہ معاہدہ کویت کے وزیر دفاع شیخ عبداللہ علی عبداللہ السالم الصباح کی قیادت میں اعلیٰ سطح کے کویتی وفد کے دورۂ پاکستان کے دوران طے پایا۔ وفد میں چیف آف جنرل اسٹاف لیفٹیننٹ جنرل خالد درج سعد الشریعان بھی شامل تھے۔
کویتی وفد نے راولپنڈی میں وزارتِ دفاع میں وزیر دفاع خواجہ محمد آصف سے ملاقات کی، جس میں باہمی دلچسپی کے امور، بالخصوص دوطرفہ دفاعی تعلقات اور سیکیورٹی تعاون پر تبادلہ خیال کیا گیا۔
نئے معاہدے کے تحت پاک مسلح افواج مختلف شعبوں میں کویتی مسلح افواج کو معاونت فراہم کریں گی، جن میں تربیت، استعداد کار میں اضافہ، سرحدی انتظام اور دفاعی تعاون کے دیگر باہمی طور پر طے شدہ شعبے شامل ہیں۔
یہ معاہدہ ’’دفاعی تعاون معاہدہ 2023‘‘ کے تحت قائم موجودہ فوجی تعاون کے فریم ورک کو مزید آگے بڑھاتا ہے۔
دونوں جانب سے دفاعی شراکت داری کو مزید مستحکم کرنے کے عزم کا اعادہ کیا گیا۔ فریقین نے کہا کہ یہ تعاون دونوں برادر ممالک کے درمیان گہرے اعتماد، باہمی احترام اور مشترکہ تزویراتی مفادات کی عکاسی کرتا ہے اور باہمی سلامتی، علاقائی امن اور استحکام میں معاون ثابت ہوگا۔