پاک فوج کے شعبۂ تعلقاتِ عامہ (آئی ایس پی آر) کے مطابق افغان طالبان رجیم نے 30 جون کو بلوچستان کی سرحد پر 4 ڈرون بھیجے جنہیں سکیورٹی فورسز نے کامیابی سے مار گرایا۔
آئی ایس پی آر کے مطابق یہ اقدام اُن کی جانب سے اپنے زیرِ کنٹرول علاقوں سے سرگرم دہشت گرد تنظیموں کی سرپرستی اور حمایت کے سلسلے کی ایک کڑی ہے۔
آئی ایس پی آر نے کہا کہ پاکستان کے مضبوط فضائی دفاعی نظام نے تمام ڈرونز کی فوری نشاندہی کی اور کامیابی سے چاروں ڈرونز کو تباہ کر دیا۔
آئی ایس پی آر کے مطابق پاکستان کے بروقت، مؤثر اور فوری ردِعمل کے باعث دشمن کے مذموم عزائم کو کامیابی سے ناکام بنادیا گیا۔
آئی ایس پی آر نے خبردار کیا کہ افغان طالبان کا غیرذمہ دارانہ طرزِ عمل افغان عوام کی مشکلات میں مزید اضافہ کر رہا ہے۔
افغان طالبان کو پُرامن بقائے باہمی کے اصولوں پر عمل کرنا چاہیے۔ افغان طالبان رجیم دہشتگردوں کی سرپرستی ترک کرے۔
آئی ایس پی آر نے کہا کہ افغان طالبان نے پاکستان کے خلاف اشتعال انگیزی کا سلسلہ جاری رکھا تو انہیں ایسا مؤثر جواب دیا جائے گا جس کی بھاری قیمت چکانا پڑے گی۔